uMthunywa
Ethel Ncube
IQEMBU leMatojeni Melo Maniacs livakatshele elizweni leAustria lapho elizabe lihlabelela lokugiya okwamaviki amabili.
Iqembu leli lisuke kuleli ngoLwesibili kuyonale iviki.
Intatheli ixhumane lomunye olilunga laleliqembu uNomathamsanqa Mkhwananzi obike ukuba iqembu labo litsha kodwa selenze umsebenzi oncomekayo kakhulu ngesikhathi esifitshane.
“Iqembu lethu leli silenyanga ezintathu silisungule njalo lokhe saqala iqembu leli size sathola ukwethulela abantu umsebenzi wethu okwakuqala kuPhenomenal Festival of Lights eMatopo”.
“Iqembu leli lilamalunga abalisa uNomathamsanqa Mkwananzi, Thandy Dhlana, Nolizwe Ngwenya, Blessing Nqo Nkomo, Mthabisi Moyo kanye loBeck Marabha Phiri.
“Silengoma ezithi Pembela, Emeli loDlala Regina kanye lethi Inkomo Zamalobolo.
“Uthe ngoLwesibili bazaqala ukwethulela izizalwane ze-Austria imigido yabo kanye lokuhlabelela,” kubika uNoma.
Uqhubekele phambili echaza ukuba iqembu labo lizabukisa kabanzi ngamasiko e-Africa.
“Sizakube sigida, sigiya, sitshaya ingungu sijabulisa eVienna. Siqala mhla zintathu kuLwezi kuwonalo umnyaka.
“Sicela lisikhulekele konke kusihambele kuhle size siphenduke ekhaya siphilile,” kuphetha uNoma.
