uMthunywa
Ethel Ncube
AKUBIZWA ozwayo ngempelaviki ePalace Hotel koBulawayo lapho iqembu le-Inkululeko Yabatsha School of Arts (Iyasa) elizabe lijabulisa khona uzulu ngobugcitshi balo kwezemidlalo.
Iqembu leli lizabe litshaya koNtuthu okwesithathu lonyaka njalo lithembisa abalandeli balo uluju lodwa.
UMthunywa uxhumane lomqondisi weqembu le-Iyasa, uNkululeko Dube uveze ukuba amalungiselelo asezingeni eliphezulu.
“NgoMgqibelo sizabe sithokozisa abantu bakoBulawayo okwesithathu lokhe kuqale umnyaka ka2023.
“Yithi esizavula indlela ePalace ukwenzela ukuba uBaba Harare ezongena inkundla ibe isivuthiwe,” kubika uDube.
Uqhubekele phambili eveza ukuba iqembu lakhe livele lihlala lilungisile.
“Sesiphekile, sabonda kwavuthwa sesimelele ukuba ilanga lifike siyephakulula ePalace uzulu azikholisele. Sizagida kuqothuke phansi.
“Sizabe sisenza esidume ngakho ngeke sibadanise abalandeli bethu, sithi sondelani Bulawayo omuhle sizokholisa ndawonye sithole ukudla kwamehlo,” kuphetha uNkululeko.
Iqembu le-Iyasa ngelinye lamaqembu akuleli eselithole izicoco ezehlukeneyo ngenxa yobugcitshi balo kwezemidlalo njalo selivakatshele amazwe atshiyeneyo lisiya bukisa ubugcitshi balo lobu.