uMthunywa
Blessing Moyo
ABALIMI bakhuthazwa ukuba balime i-green pepper okuyisilimo esingahluphiyo ukulima futhi esakha umzimba.
Ingcitshi kwezeHorticulture kunhlanganiso ye-Agritex uNkosazana Treggy Mpofu uthe abalimi bangalima i-green pepper balakho ukuzitshayela inala kodwa kudingeka ukuthi umlimi alandele izixwayiso zokulima isilimo lesi.
Ekhuluma loMthunywa uNkszn Mpofu uthe kulendlela abalimi okumele balime ngayo i-green pepper ukuze isivuno sibe phezulu.
“Ungakahlanyeli kumele uhlanganise umhlabathi wakho lomvundiso ukuze isilimo senze kuhle. Dweba imizila kumbe imfolo itshiyane ngemitha eyodwa kukanti nxa usuhlanyela amagodi akho wona kumele ehlukane nge-40cm.
“Nxa sokumele sithele ifethalayiza kumele umlimi afake i-top dressing ye-organic fertiliser. Nxa isilimo lesi sesimilile umlimi kumele athelele impande kuphela hatshi amahlamvu ngoba izithelo zesihlahla lesi zingaba manzi kakhulu zicina zibola,” kuchaza uNkszn Mpofu.
“Kuqakathekile njalo ukuba ama-green pepper angathinti phansi ngakho umlimi kumele abophele izihlahla zesilimo ezigodweni ukuze zihlale zimile zingaze zasindwa ngabantwana.
Uthe i-green pepper yisilimo esingandisanga ukuhlaselwa yimikhuhlane eminengi nengi kodwa-ke kuqakathekile ukuba umlimi ahlale ehlakulela izilimo zakhe ukuze zingahlaselwa yimikhuhlane.
uNkosazana Treggy Mpofu onguHorticulture Specialist
“Okunye njalo okuqakathekileyo yikuthi umlimi afafaze imithi evikela izibungu. Nxa amahlamvu esilimo lesi angagoqana siyabe sesihlaselwe zintwala, kumele umlimi afafaze amanzi alesepa,” nguNkszn Mpofu lowo.
I-green pepper iqala ukuthela ngemva kwamaviki angu-11 ihlanyeliwe.
“Nxa isithela kumele uvune enkulu ngokuyiquma ngengqamu kunina njalo akumelanga uhlalise izithelo lezi isikhathi eside kunina ngoba kubangela ukuthi isilimo lesi sime ukuthela kukanti sona kuyabe kumele siqhubeke ukuthela kuze kufike isikhathi somqando,” kuphetha uNkszn Mpofu.
