uMthunywa
Wayne Ncube
ABALIMI ngalesisikhathi sokulima bakhuthazwa ukulima ngendlela ye-crop rotation ukuze umhlabathi uhlale uvundile.
I-crop rotation yindlela ehlelekileyo yokulima izilimo ezehlukeneyo ngomnyaka endaweni yokulima eyodwa.
Ekhuluma loMthunywa uNkosazana Nozipho Ncube ongumlimi eNkayi uthe ukulima ngendlela ye-crop rotation yindlela yokugcina umhlabathi uvundile.
“Abalimi asebelime endaweni eyodwa isikhathi eside kabatshintshanise izilimo abazilimayo ukuze bathole ukudla endaweni zabo zokulima.
“Ukulima isilimo esisodwa eminyakeni eminengi endaweni efanayo kuyaqeda umvundiso osetshenziswa yisilimo leso okwenza umhlabathi ucine usehluleka ukusikhulisa okubangela ukufa kwesilimo esihlanyelweyo lokuthi umlimi angatholi isivuno esihle.
“Indlela ye-crop rotation ingumanqoba ngoba iyawugcina umvundiso emhlabathini kusiya ngokuthi yiziphi izilimo ezihlanyelweyo. Umlimi ohlakaniphileyo ngonanzelela ukuthi isilimo ngesilimo sifuna umvundiso onjani ngakho ukutshintshanisa izilimo ezisebenzisa i-nitrogen enengi zitshintshana lezilimo ezibisela i-nitrogen emhlabathini kwenza umhlabathi uhlale ulokudla kwezilimo ngakho umlimi uyasithola isivuno esihle,” kutsho uNksz Ncube.
UNkszn Ncube uphinde wathi ukusebenzisa indlela ye-crop rotation kuyavikela izilimo kumikhuhlane lakuzinanakazana ezihlasela izilimo.
“Obunye ubuhle bokulima ngendlela ye-crop rotation yikuthi kuyehlisa ubudli obunjenge zibungwana ezihlasela izilimo. Lokhu kungoba izibungu ezihlasela isilimo somumbu kungahlanyelwa isilimo sendumba asitholi ukudla ngakho siyafa kuthi lapho sokuhlanyelwa umumbu ngomnyaka olandelayo siyabe singasekho.
“Ngokufanayo lemikhuhlane ehlasela izilimo ezehlukeneyo iyaphela ngokutshintshanisa izilimo,” kuchaza uNksz Ncube.
UNkszn Ncube ungezelele wathi i-crop rotation ilusizi ngoba iyavimbela ukugugudeka komhlabathi.
“I-crop rotation ilusizo njalo kumlimi ngoba iyavimbela ukugugudeka komhlabathi. Ukutshintshaniswa kwezilimo kuluncedo ngoba ezinye izilimo zilempande ezinde njalo ezinkulu ezibamba umhlabathi ukuthi ungakhukhulwa ngamanzi.
“Ngokusebenzisa indlela le umlimi sengathola isivuno esihle minyaka yonke,” kuphetha uNkszn Ncube.
