uMthunywa
Langelihle Moyo
ABALIMISI sebekhuthaze abalimi ukuthi balime imibhida yohlobo lwe-chomolia ngendlela engabalethela inzuzo, okudingakalayo nje yikuthi balandele indlela abazifundiswayo zokuyinakekela.
Uthe i-chomolia yisilimo esingahluphiyo ukunakekela.
UNkosazana Moreblessing Dube ongumlimisi esabelweni se-Matabeleland South, ukhuthaze abalimi ukuthi balime imibhida ye-chomolia ngendlela ezabalethela inzuzo ephezulu.
Uthe i-chomolia ingalinywa loba kuwuphi nje umhlobo womhlabathi.
“Umlimi engalima i-chomolia ngokusebenzisa inhlanyelo loba esebenzisa amaxhakela awathethe esivunweni sakhe. Nxa egebha amagodi kumele atshiyane nge-40cm emzileni. Imizila yamagodi kumele itshiyane nge-60cm. Umlimi engagebha amagodi akhe kumele afake umquba wenkukhu loba owenkomo ukuze umhlabathi uthole ukudla,” kutsho uNkszn Dube.
“Umlimi kumele aqinisekise ukuthi umhlabathi wakhe uhlala umanzi ukuze isilimo sikhule kuhle. Indlela zokuthelela umlimi angazisebenzisa zigoqela i-flooding, sprinklers kanye lokuthelela ngebhakede.
“Ukuthelela ngebhakede kuyancedisa ukukhipha lezibungu ezihlasela i-chomolia ngoba uyabe uthelela phezulu emahlamvini esilimo,” kuchasisa uNkszn Dube.
Uphethe ngokuthi isilimo lesi siyahlaselwa kakhulu yizibungu ezitshiyeneyo kodwa singavikelwa ngokusebenzisa imithi yokuxotsha izibungu.
“Umlimi kumele ananzelele izibungu ezigoqela intwala, i-diamond backmoth kanye lama-leaf miner okuyizibungu ezidla amahlamvu.
“Ekuvikeleni izilimo kuzibungu lezi umlimi angasebenzisa imithi enjenge-DDVP ukuvikela intwala le-Demise ukuvikela izibungu ezinjengama-leaf miners kanye le Malathione ukuvikela i-diamond backmoth,” kuphetha uNkszn Dube.
