uMthunywa
Wayne Ncube
NGESIKHATHI kumele iqembu leChicken Inn livule isikhala kungalane kanobhutshuzwayo yeCastle Lager, lona likhetha ukubuyela muva ngokuvilapha kwabadlali balo enkundleni.
Ukubukela leliqembu kulezinsuku kutshiya ababukeli bomdlalo bezibuza ukuthi yini esikhona enyaweni zabadlali balo. Akubuzwa muntu ukuthi mhla idliwa yiHighlander kumdlalo wasekhaya kumaviki adluleyo, iChicken Inn yaphenduka yabayinkukhu ecuthiweyo, ingatshengiseli lakancane ukuthi iliqembu elilakho ukuthwala inkezo yeCastle Lager.
Ithe inqotshwa 2-0 yiBosso, ihle yaphelelwa ngamaqhinga nanko phela iphose yadliwa yiChapungu lula. Ukudlala kwayo akuthabisi lomqeqetshi wayo uJoey Antipas.
“Akuthabisi lokhu ngoba imidlalo eseleyo inzima.”
IChicken Inn kumdlalo weligi olandelayo idibana leHarare City. Izayamukela iTriangle eLuveve, iyedibana leMushowani, iqede lapho ibesekhaya leHwange kanye lomakhelwane iBulawayo Chiefs.
UAntipas ukholwa ukuthi bathole igunya lokuthi banqobe njengalokho abakwenza isizini iqalisa. AmaGamecocks asehlohle amabhola angamatshumi amathathu lasikhombisa.
“Abadlali bami balomthwalo ongelula, kubuhlungu ukubalekelwa yimiklomelo ngemva kokukhokhela sonke isikhathi. Asisadlali kuhle kuPSL, izinga lebhola leqembu selehlile.
Kodwa lumqeqetshi uthe abakalahli ithemba.
ICaps United ephezulu kwengalane ilemiklomelo engu-47, iChicken ilandela nge42.
Ababukeli labalandeli bomdlalo bathi ngesikhathi iqembu lithengisa umdlali wabo uClive Augusto esiya kuMaritzburg United F.C, kwahle kwaba yikuwa kwalo phambi kwegedi.
Umqeqetshi weqembu leli laye ulendima ezimbili azikhangele ngasikhathi sinye. Ngakolunye uhlangothi ungumqeqetshi wesizwe kumaWarriors. Esinye isiphathamandla seChicken Inn sithe uAntipas uzaphazanyiswa yikuqeqetsha amaWarriors.
“Lokhe wabizwa kumaWarriors, iqembu lethu alisenzi kahle. Ukusebenza amaqembu amabili ngasikhathi sinye kuyasilimaza,” kutsho lesi isiphathamandla esale ukuqanjwa.
