uMthunywa
Thokozile Mbedzi
KUBE yinjabulo enkulu kwabeAshava Designs kulandela ukuthola isicoco sokuqala samabhizimusi asakhulayo eseBest SMEs Tourism Related Facility Stand kumbukiso weSanganai/Hlanganani World Tourism Awards obukoBulawayo kuviki ephelileyo.
UMqondisi we-Ashava Designs uRose Vambe uthe bajabule kakhulu ngokukhethwa kwabo ukuthi babe lombukiso omuhle.
“Ngilokuthokoza okukhulu ngokunikwa isicoco seBest SMEs Tourism Related Facility Stand kumbukiso weSanganai/Hlanganani World Tourism Awards.
“Ukuzimisela kwethu njengenkampani esakhulayo yikho okwenze ukuzikhandla kwethu kwabonakala njalo kwaphakanyiswa,” kutsho uVambe.
“Lanxa silobunzima bokuthola izimali zokuba sisebenze imisebenzi yethu kodwa siyangena emabhanga sithole ukuxhaswa ukuze lathi senelise ukusebenza.
“Ukubekezela kuyinto enhle kakhulu ngoba lamhlanje sesize lathi savela emphakathini ukuba imisebenzi yethu iyancomeka njalo iyabukeka.
I-Ashava Designs igxile kwezokuthunga impahla ezilohlonzi zalabo abaziqhenya ngobuntu babo.
“Ngikhuthaza abesifazana abakumabhizimusi atshiyeneyo ukuthi kabaqinisele kulokho abakwenzayo ukuze baphumelele labo amagama abo azaziwa.
“Ngilokubonga okukhulu kuMphathintambo wethu lengatsha zonke seSanganai ngesicoco lesi ngoba siveza sobala ukuba uhambo lwethu lanxa belunzima kodwa luzaba luhle.
“Sizagqugquzela labanye abesifazana ukuthi basebenze nzima bathuthukise izimuli zabo lelizwe lethu,” kuphetha uVambe.