uMthunywa
Bongani Ndlovu
INENGI labalimi livame ukulima lingahlolisanga umhlabathi elilima kiwo okwenza lingazi ukuthi yiphi inhlanyelo evumayo okwenza licine lingenelisi ukuba lesivuno esihle.
Ekhuluma lentatheli uMnumzana Ndabezinhle Maphosa uthe abalimi kumele bazi indlela zokusebenzisa umhlabathi.
“Siyazi ukuthi umhlabathi yinto ebalulekileyo nxa sikhuluma ngezokulima. Ngakho kulento ezinengi okuyabe kumele umlimi azikhangelisise emhlabathini ngaphambi kokuba alime izilimo zakhe,” kuveza uMnu Maphosa.
Uqhubekele phambili wabika ukuthi kuqakathekile ukuhlolisa umhlabathi nxa ungumlimi ukuze wenelise ukulima izilimo ezihambelana lomhlabathi wakho.
“Kuqakathekile ukuthi phambi kokuba ulime kumele uqale uhlolise umhlobo wenhlabathi kanye lendlela ogcina ngayo ubumanzi.
“Kulenhlabathi evumela amanzi ukuthi angene iphinde iwagcine njengetshebetshebe ngakho kumhlabathi onjalo kumele kulinywe izilimo ezifuna amanzi ikakhulu ezikhulela phansi. Kube sekusiba lomhlabathi oyisidaka ongagciniyo amanzi, umlimi kumele alime izilimo ezihambelana lomhlabathi onjalo,” kuchaza uMnu Maphosa.
Ubuye walandisa njalo ukuthi okunye okumele umlimi akukhangelisise emhlabathini yikuthi umhlabathi wakhona ugcina njani ukudla.
“Eminye imihlabathi ayigcini ukudla kube sekusiba leminye egcina ukudla okwesikhathi eside, ngalokhu-ke umlimi kumele enelise ukulima izilimo ezihambelana lomhlabathi onjalo,” kuchaza uMnu Maphosa.
Uphethe ngokuthi abalimi bangekeli ukukhangelisisa inhlabathi ngaphambi kokuthi balime ukuze babe lesivuno esihle.
“Ungalima ungelalo ulwazi ngomhlabathi olima kuwo sungekela ukuvuna izilimo zakho ngoba ziyabe zingahambelani lomhlabathi olima kuwo kungasikho ukuthi yindawo olime kuyo engavundanga,” kuphetha uMnu Maphosa.
