uMthunywa
UYINTO enhle ukwenza iphupho lakho lifezeke, kuliviki sihlangana lejaha elasebenza nzima ukuze amaphupho alo afezeke. Loba like lahlangana lenhlupho endleleni alizange livume ukuthi lokho kulibisele emuva. Lujaha seke wathola isicoco sokuba yintshantshu kwezokuba nguDJ koBulawayo. Iphephandaba likazulu lixhumane loWalter Ncube odume ngokuthi nguDJ Sweeto.
Zizwele okunengi kungxoxo elandalelayo phakathi kukaSamkelo Tshuma (ST) loWalter Ncube (WN)
ST: Ake usilandisela ngamafitshane ukuthi ungubani ovela ngaphi?
WN: UWalter Ncube wazalelwa eGweru kodwa wakhulela koBulawayo njalo wafunda khona, ezikolo ezibalisa iNorthlea High leMilton High.
ST: Livela ngaphi ibizo elithi Sweeto njalo litshoni?
WN: USweeto libizo engaliphiwa esikolo ngoba ngangithengisa iziwiji.
ST: Ngubani owakufuqa ukuthi ube nguDJ?
WN: Angeke ngithi ukhona umuntu owenza njalo ngoba ngangithanda ukukwenza ngesikhathi ngingelakho okokwenza.
ST: Imbali yakho yokuba nguDJ iqale nini?
WN: Ukuthanda ezomculo lokuba nguDJ ngakuqala ngisesikolo eMilton High School lapho enganginxuswa khona emtshadweni ngempelaviki ngiyekholisisa abantu. Lemicimbini eyayisiba khona esikolo ngangitshaya futhi.
ST: Kungani wakhetha ukuba nguDJ?
WN: Umsebenzi lo wawuvele uliphupho lami kusukela ngisemncane njalo umculo ngiyawuthanda kakhulu yikho nje ngingamangali ukuba kule indawo.
ST: Ngubani owakusizayo ukuthi ube lodumo njalo ukwazi ukudlala endaweni eziphakemeyo?
WN: Ngo 2004 ngahlangana lo DJ Prince ngidlala komunye umtshado. Nguye owangisiza ukuthi ngenelise ukwaziwa ngabantu njalo baqale ukunginxusa ukuzodlala emcimbini yabo.
ST: Usuke wadlala emicimbini emikhulu?
WN: Yebo, sengike nganxuswa emcimbini okwakuhlabela uZahara ngomnyaka ophelileyo koBulawayo, laku DJ Cyndo ngo2013 ngiseHarare kanye lakomunye okwakulo Winky D khonale futhi eHarare.
ST: Sewake wamukela isicoco yini emsebenzini wakho?
WN: Yebo, ngancintisa kumncintiswano weRoad to Fame owawuseHustlers ngathola isicoco sokuba DJ otshaye ukwedlula abanye.
ST: Kwenzakalani ngemva kokuthola isicoco lesi.
WN: Ukuthola isicoco lesi kwangenza ngaba lodumo endaweni ezinengi ngoba ngemva kwalokho ngasengimenywa kuma-club atshiyeneyo. Ngomnyaka ka 2013 ngasebenza endaweni ezine ezitshiyeneyo njengoDJ eHarare.
ST: Yiziphi inhlupho osubhekane lazo uze ube nguDJ olodumo.
WN: Kunengi esengihlangane lakho endleleni yami yokuba nguDJ olodumo. Inhlupho lezi zibalisa ukuthi kwesinye isikhathi abanikazi bama-club bayabe bengakuhloniphi, nxa sekunjalo kubanzima ukuthi usebenze. Okunye futhi kulabo DJ abadlala ngamakhomputha njalo babhadalisa imali ephansi kwale esiyabe siyiqambile, lokho kuyasibisela emuva kakhulu.
ST: Utshadile yini?
WN: Hatshi, kodwa ngilentombi engithandana layo.
ST: Nqobe bani ongayitshiyela abanye oDJ abasacathulayo?
WN: Indlela abayithathayo idinga ukuthi babekezele njalo bafunde ukuzithiba ekwenzeni izinto ezithile. Ekucineni ngithanda ukubonga uDJ Prince, lo Quinn ngoba bangisiza ukuze ngifike lapha engikhona lamhlanje.
