uMthunywa
Langelihle Moyo
INHLANGANISO ye-Agricultural Rural Development and Advisory Services ebona ngezokulima ikhuthaza abalimi ukuthi bangavilaphi ukuhlakulela izilimo zabo ukuze zenze kuhle.
Ingcitshi kwezokulima, umqondisi kunhlanganiso le esabelweni se-Matabeleland North, uMnumzana Dumisani Mbikwa Nyoni uthe kuqakathekile ukuthi umlimi ahlakulele izilimo zakhe ukuze zikhule kuhle njalo zithole ukudla emhlabathini.
“Ngithanda ukukhuthaza abalimi ukuthi bahlakulele izilimo zabo ukuze zikhule kuhle ngoba akulunganga ukuthi ukhula lulingane lesilimo lokhu kucina kuphazamisa ukukhula kwezilimo zicine zingenzi kuhle, kumbe zisitsha. Ukhula luyaphambanisa izilimo ekutholeni amanzi emhlabathini kungakho kuqakathekile ukuthi umlimi ahlale ehlakulela izilimo zakhe. Ukuphendula umhlabathi kuyanceda njalo kuqakathekile ngoba nxa usuthelela kumbe izulu selisina liyenelisa ukuthi amanzi angene phansi,” kulandisa uMnu Nyoni
Uqhubekele phambili esithi ukuhlakulela izilimo kuyanceda ekuthini ukudla okusemhlabathini okuphezulu ungahlakula kuyangena phansi kuphathise ekukhuleni kwezilimo.
“Ungahlakula ukudla okusemhlabathini okuphezulu kuyaphendulwa kungene phansi kuphathise ekukhuleni kuhle kwezilimo. Okunye njalo ukuhlakula kuyasiza ukuthi kungene umoya ezilinyweni,” kutsho uMnu Nyoni.
Esephetha uthe abalimi bengavilaphi ukuhlakulela izilimo zabo ukuze bathole isivuno esiphezulu. “Kulezibungwana ezithanda ukuhlala lapho okulokhula khona ezihlasela izilimo, ngakho umlimi engavikela imikhuhlane le ngokuhlakulela izilimo zakhe, ngakho kuqakathekile ukuthi umlimi ahlale ehlakulela izilimo ukuze athole isivuno esiphezulu,” kuphetha uMnu Nyoni.
