uMthunywa
Wayne Ncube
IZAKHAMIZI zakoBulawayo zikhuthazwa ukuthi ziyehlabisa izinja zazo ukuze kwenqatshelwe umkhuhlane wobhova.
IVeterinary Services yakoBulawayo iqalise uhlelo lokuhlaba izinja emalokitshini akoBulawayo kuviki ephelileyo, mhlaka 16 Mpandula njalo luyaqhubeka emalokitshini asentshonalanga yedolobho leli.
Ukuhlabisa inja yinye ngayinye ukuze ivikelwe kumkhuhlane wobhova yi$1 kukanti inja yakho ingaluma umuntu ilomkhuhlane lo uhlawuliswa i$100.
Ingcitshi kwezempilakahle yezifuyo uDokotela Pollex Moyo uthe umkhuhlane wobhova uyabulala kungakho-ke kubalulekile ukuthi izinja zihlatshiswe ukuze zivikelwe.
“Ubhova luyathelelwana ngendlela ezehlukeneyo. Ungaba lalo ngokulunywa yinja elobhova kumbe njalo zona zodwa zingathelelana nxa zingalumana.
“Ulakho ukuba lobhova nxa ungathinta isilonda senja elobhova lawe ulesilonda esikhamisileyo,” kulandisa uDkt Moyo.
NgoLwesine mhlaka 26, kuzabe kuhlatshwa izinja zePumula East, Old Magwegwe, New Magwegwe kanye leMagwegwe West. Endaweni ezinengi uhlelo lolu luqhutshwa emavinkilini.
NgoLwesihlanu mhlaka 27 kuyabe kuhlatshwa izinja zeMagwegwe North erenkini yakule indawo, kuthi eGwabalanda zizahlatshelwa emavinkilini akoMaplanka, eCocktail Masina lako J Temba.
Uhlelo lokuhlatshwa kwezinja luzaphela mhlaka 3 Mfumfu.
ELuveve 5, Lobengula West kanye leNew Lobengula izinja zizahlatshwa mhlaka 30.
NgoLwesibili mhlaka 1 Mfumfu eMountain View eLobengula West izinja zizahlatshelwa emavinkilini akoMalaba eOld Lobengula.
UDkt Moyo uphethe ngokuthi endaweni lapho oseluqhutshwe khona uhlelo lolu luhamba kuhle kakhulu njalo bakhangelele ukuvikela umkhuhlane wobhova edolobheni leli.
