uMthunywa
Thokozile Mbedzi
INHLANGANISO ye-Agritex ikhuthaza abalimi kundawana zonke zelizwe ukuthi bahambe kuzifundo eziqhutshwa emzini yabosobhuku lapho abazafundiswa ngokulima endaweni abakuzo.
UProvincial Agritex Officer wesabelweni seMatabeleland North, uMnumzana Dumisani Nyoni ekhuluma loMthunywa uthe abalimi kumele bahambe ngobunengi babo bayehlonyiswa ngokulima okuvuma endaweni abakuzo njengoba bekhangelele ukuthi baqalise ukunika abalimi impahla yokulima mhlaka 15 Mpandula.
“Silohlelo lokufundisa abalimi kundawana zonke zelizwe kubosobhuku babo kungakho sikhuthaza abalimi ukuthi basukumele phezulu bayohlonyiswa kuzifundo ezilungisiweyo.
“Izifundo lezi esizibinza ngokuthi ngama-field schools zilungiswe ngendlela yokuba abalimi nxa isikhathi sokulima sifika bakwazi ukuthi balime njani ukuze bathole isivuno esihle.
Agritex
“Yikho njalo sithe abantu bafundiselwe kubosobhuku babo ngoba sibalekela ukuthi abantu bahambe imango emide besiyafunda,” kulandisa uMnu Nyoni.
Ezifundweni lezi, sifundisa abalimi ukuthi balimeni ezigabeni zabo ngoba ziyatshiyana.
“Indawo zitshiyene ngokufanayo lenhlanyelo elinywayo layo kumele yehlukane ngendawo ngendawo. Kwezinye indawo izulu lilutshwana kukanti ezinye zilezulu elinengi.
“Endaweni ezilezulu elilutshwana abalimi kumele balime inyawuthi, amabele, amazambane, omaqutha lezinye inhlanyelo ezilenhlamvu ezincane.
“Umumbu nxa izulu lililutshwana kuba nzima ukuba abalimi bathole isivuno esihle kungakho kasibakhuthazi abalimi abasendaweni ezilezulu elilutshwane ukuthi bawulime ngoba isivuno sabo singaba phansi,” nguMnu Nyoni lowo.
Uqhubekele phambili esithi bakhangelele ukuqala ukunika abalimi inhlanyelo lomvundiso mhlaka 15 Mpandula.
“Abantu nxa sebenikwe inhlanyelo leyo bayabe bekhangelelwe ukuthi benze abakufundiswayo ukuze bathole isivuno esiphezulu.
“Sikhuthaza njalo abalimi ukuthi bakhululeke loba sebelimile nxa kukhona abangakuzwisisanga bangathandabuzi ukuyadinga ulwazi kubalimisi ukuze babancedise,” kuphetha uMnu Nyoni.
