uMthunywa
KUSOBALA ukuthi isigodlo sakoBulawayo silezimbongi ezithakazelela ukukhulisa isizwe samakhosi lokugcina imbali yakoNtuthu ngezinkondlo. UMthunywa kuliviki uliphathele imbongi yakhonapha koNtuthu uLikhwa kaNcube oyimbongi njalo engumhlabeleli. Ijaha leli selike langena lakwezokucula licula loKhuxman. Okunengi ngalimbongi singakuzwa kungxoxo elandelayo phakathi kukaLikhwa Ncube (LN) exoxa lentatheli yephephandaba likazulu uEthel Ncube (EN).
EN: Ungasitshela ngempilo yakho ngamafitshane?
LN: Mina OkaNcube ngileminyaka yokuzalwa engamatshumi amabili lasikhombisa, ngikhulele khonapha koBulawayo njalo yikho engenze khona izifundo zami ezaphansi laphezulu. Kumfundo yami ngileDiploma kuQuantity Surveying. OkaNcube usebenzisana loKhuxman ekucindezeleni inkondlo zakhe.
EN:Waqala nini ukuthakazelela ukwetha inkondlo?
LN: Mina ukwenza inkondlo zami ngaqala ngabo 2006 njalo ngangilesifiso sokuthi inkondlo zami zifinyelele kuzulu wonke kodwa amacebo okuthi ngingazifikisa njani ngangingelawo. Ngahlangana lembongi edumileyo kwelakithi uAlbert Nyathi ngambikela ukuthi lami ngifuna ukuba yimbongi njengaye wasengilayela ukuthi ngibone uKhuxman angincedise.
EN: Njengoba uthole isicoco sokuba yimbongi ka2015 ku Nama uzwa njani ngalokhu?
LN: Mina ngijabule kakhulu ngilapha angazi ukuthi ngenzeni, ngimanzi te ngokuthola isicoco lesi lokuthola umakhalekhukhwini sengizafinyelela lami ukungena ebulenjini. Njalo ngibonga inkampani yeGtel ngezipho zabomakhalekhukhwini. Lokhe ngaqala lumsebenzi wokuba yimbongi angikaze ngithole isicoco kumaNama kodwa lamhlanje amanzi agelezele kimi. Ngokuthola lesi sicoco ngizizwa ngisiba lentshukuntshu yokuqhubekela phambili njalo lokhu kutshengisela ukuthi umsebenzi wami wokuba yimbongi wamukelekile.
EN: Kuyini okhangelele ukukwenza kuwonalo umnyaka ka2015?
LN: Ngikhangelele ukuba ngicindezele idlalade lami elizingoma zenkondlo ngincedisana loKhuxman. Okunye njalo ngikhangelele ukuba ngiyefika eSouth Africa lembongi edumileyo uNqindi Lerato Ndlovu ukuthi sike siyehaya inkondlo khonale njalo lokuthi saziwe ngamanye amaAfrika ukuthi siphetheni.
EN:Ngaphandle kokuba yimbongi kuyini okunye okwenzayo?
LN:Ngingumbalisi ngifundisa eLupane, eZenzele Secondary School.
EN:Njengoba ungumbalisi uyasithola yini isikhathi sokwenza inkondlo zakho?
LN: Kunzima ngoba mina lapho engifundisa khona kukhatshana lakoNtuthu ngakho nxa ngithe ngabuya ngempelaviki ngiyafika ngicindezele njalo ngihambe lasembuthwaneni eyabe ikhona ngiyehaya inkondlo zami, ezinye ngizenze ngokuhlabelela. Nxa izikolo zivaliwe yikho engithola ithuba elide ukuthi ngihambe endaweni ezitshiyeneyo ngikholisisa abantu ngezinkondlo zami.
EN: Yiliphi iphutha owake walenza phambili kukazulu ngesikhathi uhaya inkondlo zakho ongasoze wafa walikhohlwa?
LN: Ngathi ngiphakathi laphakathi kokuhaya inkondlo phambi kukazulu ngacitshelwa ngamazwi ngathula zwi ngaswela amazwi okuqhubekela phambili abantu bangihleka ukuthi sengiphelelwe.
EN: Mazwi bani enkuthazo ongawapha imbongi ezizasacathulayo?
LN: Okokuqala ngikhuthaza abantu ukuhlonipha lokwesaba uNkulunkulu. Okunye abantu kumele bafunde baqeqetshe ngoba imfundo iqakathekile kuzozonke izigaba zempilo njalo nxa uqeqetshile ukwenza izinto kubalula njalo lokuthuthukisa isiphiwo sakho kuba lula. Umuntu kumele abe lesibindi angabuyeli emuva kungaze kube nzima kangakanani.
