uMthunywa
Blessing Moyo
ZISELE zithwele imikhono emakhanda izakhamizi zeMkoba 14, eGweru kulandela ukuzwa ngenye indoda eleminyaka engu-32 yokuzalwa egade phezulu kwamatanka amanzi angaba yi-24 metres kusiya phezulu yasiziphosela phansi ngekhanda okubangele ukuthi ilimale ikhanda iqamuke lonyawo ngesizatho esingaziwayo.
Kubikwa uTrevor Bhebhe (32) ohlala eMkoba 14 wasuka emzini wakhe mhlaka 11 Nkwenkwezi ngehola letshumi ekuseni wafika wagada phezulu kwetanka leli andubana aziphosele phansi.
Isikhulumi samapholisa eNkabazwe uInspector Emmanuel Mahoko uqinisekise ngendaba le.
“Samukele umbiko wendoda eleminyaka engu-32 eyazibulalayo eMkoba 14. Amapholisa enelisa ukuyigijimisela esibhedlela kodwa ngokuswelakala kwenhlahla yedlula emhlabeni isanda kufika esibhedlela.
“Sixwayisa uzulu ukuba engathathi impilo yakhe nxa esehlangane lobunzima empilweni, kabazame ukudinga ukuncediswa ngokuyafika emapholiseni ababona ngezobudlelwano emphakathini loba kubafundisi,” kuphetha uInsp Mahoko.
