uMthunywa
YiNtatheli kaMthunywa
BAZIBUZA baswele impendulo abemuli yomunye umfundi eLupane okubikwa waya emacansini lelinye inina kusukela ngomnyaka ka-2020.
Inina leli, uThobekile Moyo, oleminyaka engu-22 yokuzalwa, ohlala esiqintini sakoMpofu eLupane, kubikwa waqilibezela umfundi oleminyaka engu-14 yokuzalwa ukuthi baye emacansini kusukela ngo2020 kuze kufike inyanga kaNtulikazi lonyaka.
Lokhu wakwenza okweminyaka emibili njalo kuzwakale ukuba uThobekile waqala “ubutshapha” lobu ngesikhathi se-lockdown lapho abantu ababengavunyelwa khona ukuphuma lokuhambahamba kusenqatshelwa umkhuhlane weCovid-19.
Lokhu kuvele ngesikhathi uThobekile emiswa emthethwandaba kaMantshi eHwange, esetheswa icala ngaphansi komthetho ka-Section 66 (1) (b) (i) owe-Criminal Law (Codification and Reform) Act, Chapter 9:23.
UThobekile Moyo
Inkundla ibikelwe ukuba ngomnyaka ka-2020, eqalisa into yakhe, uThobekile waqoqodela umfana ekamelweni lakhe.
Umfana, ngoba ecabanga ukuthi nguyisezala, wavula isivalo sekamelo ekhululekile engacabangeli ukuthi kukhona okuzamehlela.
Ngenxa yokuthi uThobekile wayevele eleqhinga, wacela umfana ukuthi amphelekezele la ahlala khona. Umfana wala kodwa wacina evuma.
Ekufikeni kwabo, inina leli langenisa umfana ekamelweni lalo, lambandezela lamhlukuluza ngokocansi.
“Ekufikeni kwabo lapho okuhlala khona umsolwa, bobabili bangena ekamelweni, umsolwa wasecela umamangala ukuthi alale ubusuku bamhlalokho.
Umsolwa wethusela umamangala ngokumlimaza nxa engala,” kuchaza isifinqo esivele emthethwandaba esiphethwe liphephandaba likazulu.
Kubikwa uThobekile waqala ukubamba bamba izitho zangasese zomfana, wamcela ukuthi benze ucansi. Inkundla izwe ukuba bobabili baqhubeka besiya emacansini bonke okwamahlandla amanengi, kusukela lapho.
Ukuze udaba lwabo luvele emphakathini, kuvuse abadala inkophe, kubikwa kulelanga lapho okwabonakala kunyathele unyawo lomfana emzini okuhlala khona uThobekile. Inkundla itshelwe njalo ukuba bobabili babonakala kanenginengi bekwenye ibhawa eLupane.
“Udaba lwabikelwa amapholisa eLupane.
Umamangala wahanjiswa esibhedlela se-St Luke’s lapho ahlolwa ngodokotela.
Ubufakazi lobu buzavezwa. Umsolwa wenza icala,” inkundla yomthethwandaba ikuzwile lokhu.
