uMthunywa
Msilisi Dube
INHLANGANISO ekhangele ngezokulima eyeAgritex ikhuthaza abalimi ukuba bagqoke impahla zokuzivikela nxa befafaza izilimo ngemithi ukwenzela ukuba bengaguliswa yimithi le.
Kubikwa kulezi insuku kulomoya ovunguzayo ngakho abalimi nxa bengasazivikelanga ngempahla le balakho ukuguliswa yimithi leyo kungakho kubalulekile ukuthi baqakathekise impilo zabo ukuze baqhube emsebenzini wabo.
UMnumzana Thabani Sibanda ongumlimisi esigabeni seLower Gwelo, uthe imithi efafazwayo iyingozi empilweni yomlimi ikakhulu nxa engazivikelanga.
“Kuqakathekile ukuba umlimi agqoke impahla ezivala amehlo, amakhala, umlomo kunye lezandla ukwenzela ukuba umuthi lowo ungamngeni phakathi.
“Njengoba kulomoya ovunguzayo kulezinsuku abalimi kumele babone ukuba bavikelekile ngazo zonke izikhathi.
“Kulabalimi abavame ukufafaza izilimo zabo besebenzisa ama-sprays abizwa ngokuthi yi-Knapsack Sprayer ngakho kuyabe kumele bathenge izigqoko okumele bazisebenzise ezitolo ezithengisa imithi leyo. Impilakahle yabalimi iqakathekile kithi yikho sisithi kumele bazinakekele,” kuchasisa uMnu Sibanda.
Kubikwa esikhathini esinengi imithi evame ukusetshenziswa ngabalimi laba ilakho ukubagulisa ngemva kwesikhathi eside beyisebenzisa.
“Eminye imithi esetshenziswa ngabalimi laba ilakho ukuhlasela umlimi ngemva kwesikhathi eside ngakho kuyabe kumele azivikele ukuze engahlaselwa yimikhuhlane ebangelwa yimithi le.
“Imithi le ilakho ukuhlasela amaphaphu, isibindi kunye lezinso kungakho kubalulekile ukuba abalimi bangafafazi izilimo zabo nxa kulomoya omkhulu ngoba imithi yonke ilakho ukuphetshulwa ngumoya ingene emlonyeni kanye lemakhaleni,” kuphetha uMnu Sibanda.
