uMthunywa
Blessing Moyo
INHLANGANISO ebona ngezokulima ngaphansi kogatsha olubona ngezoMhlabathi, Ezokulima, Amanzi, Ezomumo womkhathi, eye-Agritex isixwayise abalimi ukuthi bagcine kuhle inhlanyelo eseleyo behlanyela lonyaka labazayikhetha isivuno sabo sesivuthiwe ukuze benelise ukuyihlanyela ngesigaba sokulima esizayo.
Ekhuluma loMthunywa uMnumzana uDumisani Nyoni onguMatabeleland North Provincial Head kunhlanganiso ye-Agritex uthe inhlanyelo kumele iphathwe ngobunono baphezulu ukuze ingonakali.
“Abalimi abanengi abaphuza ukuthola inhlanyelo batshiywa yisikhathi sokulima abanye abalimi inhlanyelo yasala, kuqakathekile ukuba balondoloze inhlanyelo leyo ngoba kuyiyo abazaqala ukuyihlanyela kusigaba sokulima esizayo. Umlimi munye ngamunye kumele abalesiqiniseko sokuthi inhlanyelo yakhe isendaweni lapho okungangeni amanzi khona ngoba amanzi ayaphambanisa inhlanyelo.
Agritex
“Inhlanyelo icina isimila umlimi acine elahlekelwa yinhlanyelo ayabe ekhangelele ukuyisebenzisa. Okunye njalo umlimi kumele agcine inhlanyelo yakhe endaweni ewomileyo futhi etshaya umoya,” kulandisa uMnu Nyoni.
Uqhubeke echaza ukuthi kuqakathekile ukuba umlimi afake inhlanyelo yakhe endaweni evalekileyo njalo afake lomuthi.
“Umlimi kumele afake inhlanyelo yakhe ezitsheni ezivalwayo ukuze imbovane kumbe impehlane zingafinyeleli, okunye njalo kumele umlimi afake imithi ukuze imbovane zingafinyeleli,” nguMnu Nyoni lowu.
“Kulabo abakhetha inhlanyelo ezilinyweni abazilimileyo kumele bakhethe inhlanyelo evuthwe kuhle njalo kuqakathekile ukuba bayomise yome qha ukuze ingonakali,” kuphetha uMnu Nyoni.
