uMthunywa
Thokozile Mbedzi
INHLANGANISO ye-Agricultural Research and Innovation Development Directorate isikhuthaza abalimi kundawana zonke zelizwe ukuthi bakhuthathele uhlelo lokufuya inhlanzi ngoba zilenzuzo enhle nxa sebezithengisa.
Ekhuluma lentatheli kaMthunywa uClemetain Zvavhahera onguResearch officer eHenderson Institute ekhuluma eseTrade Fair kuviki ephelileyo uthe uzulu kathathele phezulu uhlelo lokufuya inhlanzi ngoba zilomkambo omuhle.
“Uzulu kathathele phezulu uhlelo lokufuya inhlanzi ngoba zilomkambo omuhle njalo zilungele imuli. Inhlanzi ziqala ukuvunwa sezilenyanga eziyisithupha kusiya kweziyisikhombisa.
“Ngokunjalo abalimi bakhululekile ukuxhumana lathi nxa bedinga izifundo ngohlelo lolu.
‘Sikhona ukubaphathisa ngazozonke indlela; ngobuchwepheshe obujulileyo kanye langezinye indlela ukuze bathole isivuno esihle njalo bathole lemkambo.
“Abalimi siyabaphathisa ngezifundo abafisa ukubazazi mayela lokuba bafuye inhlanzi njengendlela yokubathuthukisa.
“Okunye njalo esilakho yikubazisa ngalokho abangakudinga ekufuyeni kwabo inhlanzi lalakho abangakuthenga ukuze benelise ukufuya inhlanzi lendawo abangazithenga kuzo.
“Umlimi kumele ngaso sonke isikhathi ananzelele ukuba kulomoya esiwuphefumulayo echibini lakhe lenhlanzi ngoba zingawuswela inhlanzi kaziphili kuhle njalo angalahlekelwa.
“Lokhu kubonakala ngenhlanzi sezindenda phezulu kwamanzi kungakho kumele umlimi athele amanzi amatsha echibini lakhe ukuze umoya odingwa zinhlanzi ubekhona.
“Ukudla kwazo kumele ziphiwe ngokuba zona zingakananai kule-starter, i-grower le-finisher konke lokhu abafuyi balakho ukuphathiswa ukuba bangakuthola ngaphi njalo bakunike njani inhlanzi zabo,” kuphetha uMnu Zvavahera.
