uMthunywa
Bongani Ndlovu
ABALIMI abafuya imbuzi bakhuthazwa ukuthi bafuye ama-boer goats ngoba engumhlobo wembuzi olenyama elohlonzi.
Ekhuluma lentatheli, uMnu Peter Mukombe ongumlimi ofuye imbuzi uthe umhlobo lo ulenyama enhle kakhulu.
“Wonke umlimi olesifiso sokungena kubhizimusi yokuthengisa inyama yembuzi kafuye umhlobo we-boer goats.
Imbuzi lezi zibonakala ngombala wazo obomvu ojiyileyo. Zilendlebe ezinde kanye lempondo ezikhangele emuva.
“Umhlobo lo ungatholisa umlimi inzuzo ngoba zimbuzi ezinkulu. Enduna enkulu ingaba lesisindo esingaba yi-115kg kuthi ensikazi yona esikhulile ingaba yisilinganiso se-75kg,” kutsho uMnu Mukombe.
UMnu Mukombe uphinde wathi umhlobo lo awuhlaselwa yimikhuhlane eminengi njalo umbala wazo uzenza zenelise ukuphila lapho okulelanga elitshisa khona kakhulu.
“Imbuzi zomhlobo wama-boer goats ziyenelisa ukuzivikela emikhuhlaneni eminengi eyandise ukuhlasela imihlobo evela ngaphandle kwelizwe.
“Umbala wembuzi lezi uzenza zenelise ukumelana lelanga elitshisayo ikakhulu elakuleli ilizwe. Ziqinile njalo ziyenelisa ukuhamba umango omude zidinga amadlelo,” kungezelela uMnu Mukombe.
UMnu Mukombe uphinde wathi imbuzi lezi ziyanda ngesikhatshana ngoba ziyenelisa ukuzala minyaka yonke.
“Imbuzi zomhlobo wama-boer goats ziyenelisa ukuzala kathathu ngeminyaka emibili kuphela ngakho ngesikhatshana nje umlimi ozifuyayo uyathola inzuzo.
“Amazinyane akhona azalwa eqinile esenelisa ukuzimunyela njalo ayakhula masinyane. Ngalesisizatho umlimi akala msebenzi omnengi wokunakekela imbuzi lezi,” kuchaza uMnuMukombe.
Kubikwa labo abalesifiso sokufuya umhlobo wembuzi lezi ziyatholakala ikakhulu kubalimi asebelesikhathi bezifuya.
