uMthunywa
Langelihle Moyo
ABABONA ngezempilakahle kanye lokugcinwa kuhle kwezifuyo abeVeterinary Services sebexwayise abalimi abafuye inkomo ukuthi babone ukuba zilophawu lomnikazi okwenza kubelula nxa sezidingwa kungenzakala ukuthi zilahleke.
Kubikwa impawu ezigoqela umtshiso, amacici kunye lempawu ezifakwa endlebeni ziyancedisa ukudinga inkomo nxa sezilahlekile.
Ingcitshi kwezempilakahle yezifuyo esabelweni seMatabaleland North kunhlanganiso yeVeterinary Services uDokotela Tutsirai Vernon Dziruni uthe wonke umuntu ofuyileyo kumele abone ukuthi inkomo zakhe zonke ezisesibayeni zilophawu lwakhe.
“Nginanzelela ukuthi khathesi njengoba sekuyisikhathi sezulu njalo kulendlala imihlambi iyasabalala ngeganga idinga ukudla lamanzi, yikho okucina kusenza ukuthi zilahleke kumbe zitshontshwe.
“Okokuqala lungisanini imitshiso ezigabeni zenu kusiya ngokuthi inkomo zakho zidibha kuliphi idibha. Endaweni yakho lapho oyakhele khona, lokhu kuyancedisa ukuthi nxa inkomo sezilahlekele komunye umgcele kuyeneliseka ukuthi zazakale ukuthi ngezangaphi?
“Kuyenzakala ukuthi inkomo zeNkayi zichaphe umgcele ziyebonakala eZhombe, nxa zilomtshiso kubalula ukuthi zitholakale,” kuchasisa uDkt Dziruni.
“Okwesibili akhona amacici athengiswayo afakwa endlebeni zenkomo, alemibala etshiyeneyo. Emacicini lawa uyenelisa ukubhala inombolo yakho yocingo lebizo lakho ukwenzela ukuthi inkomo zakho zingalahleka kubekhona ozibonayo enelise ukukuthinta ecingweni.
Uthe okunye okuqakathekileyo yikufaka uphawu endlebeni.
“Njengababona ngezifuyo silikhuthaza ukuthi lisike inkomo zenu uphawu endlebeni. Liyazikhethela ukuthi liyabe lifuna ukusika uphawu olulephetheni enjani njalo kuyiphi indlebe. Loluphawu lalo luyancedisa ukuthi wenelise ukuthola inkomo zakho nxa seziduhe emhlambini,” kulandisa uMnu Dziruni.
Uphethe ngokuthi akukuhle ukuthi abalimi balahlekelwe yizifuyo ngoba zikhona indlela ezingabancedisa ukuthi inkomo zazakale ukuthi ngezangaphi kumbe ukuthi ziphuma kuwuphi umango.
“Asinanzeleleni izifuyo zethu sibone ukuthi azisilahlekeli sizifake impawu njalo lalapho sesilima sinanzelele ukuthi asizisebenzisi okwesikhathi eside lokuthi amahanisi lezitolobho akulimazi inkomo zethu,” kuphetha uDkt Dziruni.
