uMthunywa
Thokozile Mbedzi
INHLANGANISO ebona ngezokulima eye-Agritex ikhuthaza abalimi kundawana zonke zelizwe ukuthi bafake i-lime emagodini abo ka-gatshompo ngoba umhlabathi omnengi usumunyu.
Ekhuluma lentatheli kaMthunywa uMatabeleland North Provincial Agritex Officer uMnumzana Dumisani Nyoni uthe abalimi kumele bafake i-lime emagodini abo.
“Abalimi kabafake i-lime emagodini ngoba umhlabathi wabalimi omunye usumunyu ngakho nxa umhlabathi usumunyu kawuphi izilimo ukudla okwaneleyo.
“l-lime ibalusizo olukhulu kakhulu emhlabathini osubaba ngoba iyancedisa ukuba izilimo zithole ukudla okwaneleyo umlimi athole laye isivuno isiqondileyo,” nguMnu Nyoni lowo.
Agritex
“Umhlabathi nxa usubaba izilimo kazitholi ukudla okweneleyo njalo kucina kusehlisa lokho okuyabe kukhangelelwe ngumlimi ukuba uzakuvuna ngakho kuqakathekile ukuba abalimi bananzelele kakhulu umhlabathi wabo ukuthi kawumunyu ukuze izilimo zabo zithole ukudla okwaneleyo njalo okuzabenza bathole isivuno esiqondileyo.
“Abalimi nxa bangagebha amagodi abo bayahle bafake i-lime phakathi ukuze kube lokudla okweneleyo ezilinyweni zabo.”
Uqhubekele phambili esithi abalimi kumele njalo nxa begebha amagodi balungisise lemigelo engabe idalwe lizulu.
“Abalimi kumele bavale imigelo eyabangelwa lizulu emasimini abo ngoba kubangela ukuthi amasimu acina esala engela kudla ngoba sekugugudwe ngamanzi.
“Ukudla okumele kutholwe yizilimo kucina kukhukhulwa ngamanzi nxa abalimi bengakunanzelelanga, kuphinde kusale kulemigelo phakathi kwensimu edalwe ngamanzi nxa kube lezulu elinengi,” kuphetha uMnu Nyoni.
