uMthunywa
U-ASAPH uphenduka lezibiliboco sesisondela kukhefu elikhulu ngengoma yakhe uGood Times Anthem.
Lingoma iza ngemva kokuphekwa kwengoma yakhe uMambo elokhe isidla ubhedu emsakazweni lendawo zokuzithokozisa. Ngalingoma ujabulisa wonke umuntu kugoqela abadala labatsha ehlanganisa i-hip- hop lekwaito.
Lapha uAsaph ukhuluma ngempelaviki kwelakithi, ikakhulu koBulawayo nxa abantu bezithokozisa. Abantu ngempelaviki ngemva kokuthola imali ngendlela izitshiyeneyo, kungabe kungeyemazweni ithunyeziwe, loba i-bond note, loba ithunyelwe ngocingo ngabo eEcoCash bafuna ukuphuma bajabule besidla ubutsha babo.
Abanye baya emawosweni, abanye besemdumisweni yezimota abanye baya kumidlalo lemithimba ehlukeneyo ngekhefu leli elizayo.
Ngawakhe amazwi uAsaph, uthi ingoma le epholileyo ngeyabantu bonke abadinga ubumnandi obulokuthula, loba siphakathi kwenkinga zempilo.
Uthi ngoba kulokunengi okukhulunywayo lokudana elizweni, lingoma ngeyokusukumisa abantu okwemizuzu emine umuntu alibale ngenkinga ezikhona.
Lingoma icindezelwe ngumkhandi ngoma uLarynx, esekelwa ngamacaco omnawakhe uMimi Tarukwana laye osengumculi ozimele ephelele leyakhe imisebenzi. UMimi usungule uKhetha, ingoma ayisebenze loReverb 7 esingene emisakazweni njalo iyamukelwe kuhle emphakathini.
Sisakhuluma ngemisebenzi yabanye, sizatshayela ihlombe uKBrizzy ngevidiyo yakhe yengoma uDiablo ecine isungulwe ngeviki edluleyo. Lomabonakude usetshenzwe ngumqondisi wohlonzi uAndy Cutta owakhonapha koBulawayo osenze imisebenzi yabaculi belizwe jikelele ababalisa oTakura, Cindy, Alaina, Sandra Ndebele, Professor, KLAP labanengi.
Sisabambe kubaqondisi sizaqakezela lomqondisi uBlaqs ngomsebenzi wakhe osulababuki abedlula isigidi ngengoma kaJah Prayzah uDzamutsana, ephuma kudlalade lakhe elitsha lalonyaka uChitubu.
Kule ingoma kulesiphalaphala sakoBulawayo uPaula Palloma, odume ngengoma uBakumelele, ingoma ayenza lomdlali ngoma uRyan Synth ngomnyaka odluleyo njalo yaduma okumangazayo emsakazweni jikelele.
Eminye yemisebenzi kaBlaqs ibalisela uCal_Vin, POY, ExQ labanye abanengi. Imisebenzi yabaqondisi laba ikhona ebulenjini kuYou Tube.
UKhuxxman useqede ividiyo yengoma uBanolila Remix ngeviki edluleyo. Ingoma le sakhula sonke siyizwa emsakazweni.
Kule ividiyo uMzoe7 uphuma lapha egida etshona phansi etshaya ama “vosho” lama “gwaragwara” okumangazayo.
Kuhle ukubona amajaha lentombi zakithi beqakathekisa umsebenzi wamavidiyo alakho ukubukwa ngabantu bakwamanye amazwe. Qhubekani lisebenza majaha lezintombi, okuhle kuyabukwa.
