uMthunywa
Ncekwenhle Ncube
Zidla luklubhu izakhamizi zesigabeni seNyathi eDromoland kulandela ukutshabalala kwezifuyo zazo ziqedwa yimpisi ecatshangelwa ukuthi ingabe yafohla kweyinye yama-game park ebucwadlana nje.
Uhlupho lolu osolutshiye amadoda eginqile kubikwa luqale ngomnyanga odluleyo lapho izakhamizi zakuVillage 7 eDromololand zaqala ukudlelwa imbuzi lamankonyane azo kodwa zingakwazi ukuthi adliwa yini.
Intatheli ixhumane losobhuku wakulesi isigaba uMnumzana Mcapito Ndlovu yena ochaze ukuthi bathwele nzima ngalezi impisi esezibaqedele izifuyo ikakhulu inkomo ngesikhathi zisemadlelweni azo.
“Impisi lezi zisidlisa imbuya ngoluthi. Azikhethi ukuthi zibambani, zaqala zibamba imbuzi kodwa khathesi inkomo ekhulileyo ziyayilahla phansi ziyidle iphele du.
“Abantu abanengi esigabeni sebevalile izibaya ngenxa yempisi lezi. Kukhanya zavelela ngapha okuyeNtabeni zikaMambo kanti asebeke bahlangana lazo bathi zihamba zingumhlambi obalela isikhombisa,” kutsho uMnu Ndlovu.
Omunye wezakhamizi kulesisigaba seDromoland uMnunzana Stanley Moyo uveze ukuthi impisi sezibahluphile okumangalisiyo sebeze bazama icebo lokuthi njengezakhamizi baphume ijumo bayezizingela.
“Asisabuquthi ubuthongo ngempisi lezi. Izifuyo zingalala egangeni ziyadliwa noma ungazivalela ziyabuya zizohlasela ezibayeni. Kuviki edluleyo zike zabonakala kuVillage 6 zethuswa yizinja ebezikhonkotha.
“Njengesigaba sesiphume lomqondo wokuthi siphume ijumo sigcwale iganga siyezizingela lezimpisi ngoba singaphelelwa yizifuyo,” kulandisa uMnu Moyo.
UMthunywa uphinde wabikelwa ukuthi imizamo iyenziwa ngabakhangela ngenyamazana zendle ukuze babulale lezi impisi esezihluphile esigabeni lanxa nje khona benelise ukubulala eyodwa.
UChief Executive Officer weKhansili yeBubi uMnunzana Patson Mlilo ubikele iphephandaba ukuthi umbiko wempisi esezihluphile sebawuthola njalo kulabantu asebeqhatshiwe ukuzizingela kodwa uxwayise izakhamizi ukuthi izifuyo zeluswe besazingela lezinyamazana.
“Umbiko wempisi eziqeda izifuyo sesawuthola njalo sincedisana lezakhamizi ukuzizingela.
Sesiqhatshe omunye ujaha ozabe ehlala egangeni esenza okokuzicathamela lezizilwane ukuze senelise ukuziqeda.
“Izakhamizi zeDromoland sazixwayisa ukuthi izifuyo zazo zeluswe size siqede umkhankaso wethu lo owokuzingela impisi,” kuphetha uMnu Mlilo.