uMthunywa
Thokozile Mbedzi
ABAFUYI kundawana zonke zelizwe bakhuthazwa ukuthi badibhise izifuyo zabo ukuze zivikeleke kumikhaza ngoba iyingozi.
Ekhuluma lentatheli kaMthunywa uLivestock Technician uMnumzana Mlambo uxwayise abalimi ukuba bavikele izifuyo ezinjengenkomo, izimvu, lembuzi, kumikhaza ngoba igcwele ngesikhathi lesi ngoba kwezinye indawo izulu lokhu lisina.
“Inkomo kumele zisiwe edibha maviki wonke ukuze zivikelwe kumikhaza, nxa sebethe baba lohlupho kungaba ngcono bengadlulisi amaviki amabili zingayanga edibha.
“Ngithanda njalo ukuxwayisa abalimi ukuba abenelisayo balakho ukuthenga umuthi wokudibhisa ukuze bancedise izifuyo zabo kusesemasinyane. Abangenelisiyo kabazihambise edibha njalo nxa bengaqondisisi kuhle kumele basondele kwabeVeterinary babaphathise ikakhulu labo abaseduzane labo.
“Kuqakathekile njalo ukuba izifuyo lezi ezinjengembuzi lezimvu lapho ezilala khona ngesikhathi sezulu kufulelwe, lazo inkomo zingavalelwa ezibayeni ezilodaka.
“Lokhu kuqakathekile ngoba inkomo zingalimala ngamadaka njalo kwenza inkomo zingatholi ukukhululeka ngoba lapho okumanzi khona ngeke zilale zikhululekile.
“Abalotshani loba amahlanga besenelisa bangafaka amazenge ukuze imbuzi, izimvu lenkukhu kunganethwa kuvikeleke ngoba nxa kunganethwa kakhulu bangacina belahlekelwa yizifuyo zabo,” kutsho uMnu Mlambo.
“Uzulu kazame ngazo zonke indlela ukuba avikele izifuyo lazo zilale endaweni eziwomileyo ukuze zibe lempilakahle.
“Inkomo zingadibha zilale njalo endaweni ehlanzekileyo kwenza zichelese zivikeleke njalo emikhuhlaneni,” kuphetha uMnu Mlambo.
