uMthunywa
NguMsilisi Dube
NGESIKHATHI inengi lamaqembu ezemidlalo kuleli seligida imigido yakulezinsuku, umqondisi weNational Art Gallery of Zimbabwe yakoBulawayo uVoti Thebe usekhuthaze abadlali bakuleli ukuthi bavuselele imigido yomdabuko kuthi lalabo abaya bukisa imisebenzi yabo kwamanye amazwe bahambe bayeyibukisa ukuze batshengise imvelaphi yabo.
UThebe uthe abadlali abanengi bakoNtuthu sebathathekiswa yimigido yakwamanye amazwe okuyinto enganhle ngoba abatsha bacina bengasazi imigido yomdabu.
“Kuqakathekile ukuthi abadlali bakithi abafana leBlack Umfolosi nxa besiya emazweni bangayitshiyi ingquzu ukuze babelane lezizwe zonke ubunandi bomgido wakithi.
“Imigido le yayigidwa ngokhokho bethu endulo kungakho lathi kumele siyigide ngoba isifundisa ngemvelaphi yethu. Akumelanga sithathekiswe yimigido yezinye izizwe kodwa kumele sizigqaje ngemigido yakithi.
USotsha Moyo olilunga leBlack Umfolosi ubike ukuthi nxa bezakuya emazweni bazafika babukise umgido lo ukuze abantu bemazweni bakhwabithe imigido yakuleli.
“Amakhiwa ngabantu abahlakaniphe kakhulu njalo bayakuthanda ukubona abantu begida imigido eyehlukeneyo hatshi ukugida imigido eyake igidwe ngabanye. Balutshwana abahlabeleli abavame ukugida umgido lo ngakho kufanele ukuba siwugide.
“Thina sesikhulile, kufanele ukuthi ngabe sebekhona esizabatshiyela umgido lo ngoba bengivele ngilombuzo wokuthi ngizawutshiyela bani lumgido njengoba inengi elisakhulayo selisithi yizinto zakudala,” kutsho uMoyo.
Ingquzu ilakho ukusetshenziswa njengendlela yokuzithokozisa, ukuqinisa umzimba kanye lokuzethula emphakathini.