uMthunywa
Nkosilathi Sibanda
INKUNDLA zomdabu zokuthethwa kwamacala zibalulekile ekulondolozeni imikhuba lamasiko amaNdebele lokusekela ingqubekela phambili yelizwe.
Avunulile amabutho enduna uFuyana
Lokhu kukhulunywe yinduna uNgwemnyama Fuyana ngesikhathi evula isakhiwo senkundla yomthetho eMaphisa. Ukuvulwa kwenkundla le kuze ngesikhathi induna ezikumhlubulo ongezansi yelizwe sezibike ukuba zizimisele ukuvuselela indlela yomdabu yokuthethwa kwamacala ezigabeni zabo.
Amabutho elinde induna uFuyana
Ngokunjalo, zibona kuqakathekile ukuthi kube lezakhiwo zakulezi insuku lapho umphakathi azakuthi gwaqa khona, kuthethwa amacala avelayo, ngendlela okwakusenziwa ngayo endulo.
Induna uFuyana yazise umbuthano wabantu abangadlula amakhulu amabili ngemva kokuvulwa kwenkundla le ukuba isakhiwo esitsha lesi sizakuba yinsika yokuncedisa abantu ukuthi bathole ukwahlulelwa ngendla eqondileyo.
“Silokuthaba njengomphakathi wakulindawo ukuthi sesifeze lumsebenzi wenkundla yethu yomthetho,” kubika induna uFuyana.
Omama babukisa isipho esiphiwe induna uFuyana
“Inkundla le ngeyabantu. Silapha nje sizovuselela okungokwethu. Inkundla le ngeyabantu bakoFuyana.
“Inkundla le ukuze ibekhona, kwaqala ebubini. Ngathunywa yizikolo, kwakhalaza isikolo seChehondo kubikwa ukuba abazali ababhadaleli abantwana indleko zemfundo, kodwa nxa ikhefu lezikolo lifika, abantwana bahamba labomalayitsha, babhadale R1 500 besiya eGoli bengabhadalanga i-school fees. Ngacelwa ukuthi ngisondelele abazali laba kulokho.”
Induna uFuyana isenkundleni yokuthetha amacala eMaphisa
Induna ithe ngemva kwalokho kwabunjwa ikomithi yokuthi kulungisiswe okuhluphayo njalo yikho lapho okwaphuma umbono wokuthi kuhlanganiswe amakhanda lezimali zokuthi kwakhiwe inkundla yomthetho le.
“Njengoba sesiqedile umsebenzi wenkundla, kukhona okuzayo okuphambili. Mhlawumbe alikakuboni, ngizalitshengisa,” kutsho induna uFuyana.
Induna loboMlisa kumbuthano wenduna uFuyana
Ithe sekwakhiwa ikilinika esiqintini seZamanyoni.
“Sezizakhela ikilinika yomphakathini njengabantu beZamanyoni. Okwesithathu, lizakhumbula ukuthi sisendaweni enothileyo kakhulu. Inothile lindawo, kodwa asivuni ngendlela esivuna ngayo ngoba kuvuna abanye abantu, inengi labo elingayisilo lakhonala.”
Giya Mthwakazi
Induna ibonge kabanzi inkokheli zomdabu ezifike kumbuthano ezibalisa uMathema, uNyangazonke, uHobhodo, uMatshazi, uSigola, uMalaba loMlisa uManyunyi obemele induna uMarupi yase Gwanda
