uMthunywa
Blessing Moyo
ABAFUYILEYO sebekhuthazwe ukuthi babone ukuba izifuyo zabo zonke ziyathola amanzi ngalesi isikhathi sokutshisa njalo zingaze zahamba umango omude kakhulu ngoba lokhu kungabangela ukuthi zicube.
UMnuzama Dumisani Nyoni onguProvincial Agritex Officer weMatabeleland North uthe amanzi asesilela endaweni ezinengi osekusenza izifuyo zihambe umango omude kodwa kubalulekile ukuthi abalimi babone ukuba izifuyo zabo ziyathola amanzi nsuku zonke.
Provincial officer we-Agritex Dumisani Nyoni
“Isikhathi lesi siyingozi kumpilakahle yezifuyo zabalimi ngoba zandise ukucuba ngasolesi isikhathi.
“Sikhuthaza abalimi ukuthi babone ukuba izifuyo zabo zonke, kungakhathalekile ukuthi zimbuzi kumbe zinkomo, ngelanga ziyathola amanzi.
“Kukanti sixwayisa abalimi ukuthi ezimithiyo, ezimunyisayo kunye lenkabi kumele babone ukuthi ziyathola ukudla ukuze ezimunyisayo zehlise, inkabi zithole amandla ukuze nxa isikhathi sokulima sifika zenelise ukusebenza emasimini,” kulandisa uMnu Nyoni.
Uthe bakhuthaza abalimi ukuthi bangagcini inkomo esezindala esibayeni kodwa kababone ukuba bayazithengisa ukuze bathole imali yokuthengela ezinye ukudla. Uphethe ngokucebisa njalo abalimi ukuthi bavikele izifuyo zabo kumikhaza ngoba layo ingagulisa inkomo zabo.
“Abalimi kababone ukuthi izifuyo zabo ziyadibha nxa kungelamadibha kabachele izifuyo zabo ngomuthi wedibha ukuze izifuyo zabo zingabi lemikhaza engacina iphambanisa ukukhula kwezibaya zabo,” kuphetha uMnu Nyoni.
