uMthunywa
Ethel Ncube
AMAPHOLISA eZimbabwe Republic Police koBulawayo asekhuthaze uzulu wakulelidolobho ukuba atshiyane lodlame kunye lokuhlukuluzana ngesikhathi ilizwe libhekane lobhubhane lweCovid-19.
Kubikwa koBulawayo nsuku zonke amapholisa amukela imbiko yokuhlukuluzana ngakho uzulu uyakhuthazwa ukuba ahlale ngokuthula.
Isikhulumi samapholisa akoBulawayo uInspector Abednico Ncube uthe uzulu angathandabuzi ukubikela amapholisa ngokuhlukuluzana okuba khona emakhaya.
” Amacala okuhlukuluzana ngobulili ayanda. Izimuli bezingajayelanga ukuhlala isikhathi eside zindawonye kodwa ngenxa yokuvinjwa kwabantu emakhaya ngesizatho seCovid-19 sokusenza abantu babonane amaphutha baxabane okuyinto engalunganga,” kutsho uInsp Ncube.
Uqhubekele phambili echaza ukuba amanye amacala awokuhlukuluzana abantu kabawabiki emapholiseni.
” Bakhona njalo abanye abangasayiyo emapholiseni ukuyawabikela ngoba besithi emthethwandaba kuvaliwe, yebo kuvaliwe kodwa njengamapholisa sisawenza umsebenzi wethu wokubopha labo abephula umthetho. Lapho okuzavulwa khona lowo muntu uzakuyamiswa emthethwandaba athonisiswe,” kuphetha uInsp Ncube.
