uMthunywa
Ethel Ncube
INDUNA yeTsholotsho isiveze ukuba izabonga bonke abenza kuhle endaweni yayo okugoqela abahlabeleli kanye labanye abenza imisebenzi etshiyeneyo ethuthukisa isigaba ngokubanika izicoco kumcimbi ewuhlelayo.
Induna uGampu iveze ukuba izaqala ukulungiselela ukuba ibonge bonke abenza kuhle kulandela ukwenziwa komcimbi wokuphiwa kwezicoco owenzelwe koDakamela.
UMthunywa uxhumane lenduna uGampu eveze ukuba ilabo abahlabeleli abadumileyo kodwa abakaze babongwe lapho abavela khona,
“Silabahlabeleli abadumileyo abafana laboZinjazimluma, oNobuhle abeMaqhawenentaba FM abahlabela okuzwayo. Njengesigaba asikaze sibabonge kungakho ke sihlela ukuba lomcimbi wokuba phakamisa njalo sibabonge.
“Umcimbi owenziwe yinduna uDakamela ubumuhle kakhulu njalo usivule amehlo thina njengenkokheli okutsho ukuthi lathi kuzamele silandele isibonelo lesi esihle siqale ukunikeza bonke abenza kuhle izicoco kungakhathalekile ukuba usebenze okunganani,” kubika induna uGampu.
Uqhubekele phambili echaza ukuba uzahlala phansi lequla lakhe baqalise ukuhlela uhlelo lolu.
“Ngizahlala phansi lengisebenza labo sihlele ukuba umcimbi wethu sizawenza njani njalo nini.
Abahlabeleli bethu abaseGoli siyabe siyabanxusa ukuba babuye bezojabulisa emcimbini lo njalo kuyabe kuzancediswana ngendlela ezitshiyeneyo ukuze kuthengwe izicoco zabenze kuhle baphiwe lezithupha zakhona lokhu kuzabenza baqhubekele phambili besenza kuhle ukuze indawo yethu iphakame,” kuphetha induna uGampu.
