uMthunywa
BAKWETHU indaba ezimnandi kazipheli kuphephandaba likazulu nanku phela kule iviki lize leqembu elidume ngezimnandi Abafana bakaLobhengula. Bangena kuvungame umphakathi lababafana ukucula khona kangikhulumi inyoni yezulu ingumfana.
Angithi nje omunye wabaholi baleliqembu nguMxakiwezwe Ndlovu ijaha elidabuka eTsholotsho. Othanda ukujabula kule iviki nansi ingxoxo enambithekayo phakathi kwentatheli yephephandaba likazulu uCornelius Luphahla (CL) lalelijaha uMxakiwezwe Ndlovu (MN).
CL: Akuthi fahlafahla jahalakithi ngembali yakho kanye leyeqembu lenu?
MN: Mina ngazalelwa esigabeni seMathetshaneni eTsholotsho okuyikho engakhulela khona ngafunda khona izifundo zami ze-primary. Ngasuka lapho ngayafunda uFomu 1 eTshabanda Secondary ngaze ngayaqeda ufomu 4.
Ezokucula ngaziqalisa ngo2012 lapho engangicula laBafana bakaNongoma. Kuthe ngo2015 sasungula iqembu lethu elabafana bakaLobhengula lapho engicula khona ngiloSizolwezintombi kanye loHlalabemhleka.
CL: Lokhe laqala ezokucula selakhipha amadlalade amangaki jahalakithi?
MN: Njengeqembu elisaselitsha sesakhipha idlalade elilodwa ngo2016 elithi Singamkhohlwa Kanjani.
CL: Abantu bathini ngomculo wenu njalo ukhangelele ukubenzelani lonyaka?
MN: Abantu bayawuthakazelela kakhulu umculo wethu njalo bangikhuthaza ukuthi ngiqhubekele phambili ngezomculo ngoba ngiyabathokozisa. Ngalokhu sibathembisa ukuqhubekela phambili sibajabulisa ngengoma zethu.
Okunye njalo lonyaka sithembisa uzulu ukumvakatshela endaweni ezehlukeneyo sibuye njalo simhwatshele elinye idlalade ngoNhlangula ngenhloso yokubajabulisa.
CL: Landise ukudlalela ngaphi ingoma zenu njalo njengeqembu?
MN: Ingoma zethu sandise ukuzidlalela kweleSouth Africa kuma-shows kanye lakwelakithi eTshololotsho. Kwesinye isikhathi siyamenywa emitshadweni lasemadilini atshiyeneyo siyejabulisa uzulu.
CL: Bunzima bani eliyake lihlangane labo kwezomculo njalo nkuthazo bani oyipha abaculi abasacathula?
MN: Ubunzima esiyake sihlangane labo kwezomculo yikuthi abanye abantu bayasintshontshela umculo wethu bawuthengise ngentengo ephansi. Okunye njalo yikuthi sihlutshwa yimali yokuzithuthukisa kwezomculo.
Ngalokhu kubaculi abasacathula ngithi kabaqhubekele phambili bejabulisa uzulu bengadeli noma kunzima.
Ngikhuthaza njalo abaculi ukuthi bengathukani kwezomculo kodwa kabahlabelele ukulaya kanye lokujabulisa uzulu.
