uMthunywa
Ncekwenhle Ncube
IZAKHAMIZI ezakhele duze leNtaba zikaMambo esigabeni seBubi sezithwele nzima ngamaganyana asebaqedele izifuyo.
Kubikwa amaganyana la aqale ukuhlupha nyakenye.
Kubikwa izifuyo zidliwa kakhulu nxa zisemadlelweni azo kanti esikhathini esinengi amankomokazi alamabele amakhulu yiwo ajayele ukubanjwa kanye lamathole.
UMthunywa uxoxe loMnumzana Khanyiso Maseko oyisakhamuzi kule indawo ochaze ukuthi bathwele nzima ngenyamazana zeganga ezibadlela izifuyo zabo.
Uchaze ukuthi bake bancedwa ngeyinye i-game park eseduze eke yazozingela ekuqaleni kwawonalo umnyaka noma nje bengawabulala onke.
“Inyamazana lezi zisithwalise amagabha avuzayo. Nxa inkomo zingavulelwa ziye emadlelweni zingalandelwa ngabafana uhle wazi ukuthi umhlambi uzaphenduka ungenelanga.
“Emnyakeni sike sancedwa ngabe-game park eseduze lapha bake babuya bazozingela amanye bawadubula ngoba ekhanya esexhwalile.
“Kungakho nje lakhathesi sicabanga ukuthi sihlale phansi njengesigaba siphume leqhinga lokulwisana lenyamazana lezi ngoba kukhanya iganga lakithi ligcwele amaganyana njalo kukhanya lokhe ezalana. Inkomo ayayigijimisa ayidle igijima ize iphele,” kuchasisa uMnu Maseko.
Kuzwakele ukuthi kuviki edluleyo kucatshe imbuzi ezedlula ezinhlanu okucatshangelwa ukuthi zidliwe ngamaganyana la.
UMthunywa ubikelwe ukuthi inyamazana lezi zingabe zifohla e-game park eseduze lale indawo.
UMnumzana Onius Makhunga ongumabhalani kamlisa ubikele intatheli ukuthi amaganyana la axhwalile ngoba ayake ezofika lasezibayeni ezama ukuzobamba izifuyo.
“Kulabantu abafika isithupha asebedlelwe inkomo ezedlula isithupha kuwonalo umnyaka. Kusenjalo nje kulabanye abalokhe bedinga izifuyo zabo esingakwaziyo noma lazo sezabanjwa zadliwa,” kutsho uMnu Makhunga.
Phezulu kwalokho iphephandaba likazulu lizwe ukuthi kulempisi njalo ezidla izifuyo. Kubikwa sezike zadutshulwa ezinye zakhona kodwa ezinye zasala.
Usobhuku wakule indawo uMnumzana Collen Gumbo uthe uhlupho lwenyamazana lukhona sibili njalo kuyisifiso sabo njengesigaba ukuthi ababona ngenyamazana zasendle babuye bezobasiza.
“Amaganyana ayahlupha kakhulu ezifuyweni lapha. Abanye sebevalile izibaya ngenyamazana lezi. Phezulu kwalezi inyamazana silohlupho lwempisi njalo ezwakalela ukuthi ike yahlupha eDromoland,” kuphetha usobhuku uGumbo.
