uMthunywa
YiNtatheli kaMthunywa
BATHWELE amagabha avuzayo abalimi besivandeni seMasiyephambili, eNkulumane koBulawayo ngenxa yohlupho lokuswela ucingo lokubiya isivande nanko phela amasela kanye lezifuyo kungena njalonje lapha osokubangele ukuthi isivuno sabo sehle kakhulu.
UMgcinisihlalo wesivande seMasiyephambili, uMnumzana Edward Mpofu uveze ukuthi ukuswelaka imali yokuthenga impahla yokubiya isivande sabo sekubehlisele kakhulu isivuno sabo ngoba kungena obabhemi kanye lamasela.
“Sithwele nzima ngenyamazana ezifana labobabhemi abangena lapha badle izilimo zethu kanye lamasela atshontshayo. Lokhu kusenza sehluleke ukuthola isivuno esiyabe sisikhangelele.
“Sidinga uncedo lwezitina lesamende ukuze sakhe umduli wokubiya isivande sethu loba nje kungaba lucingo kungasiphathisa kakhulu ukuthi senqabele inyamazana ukuthi zingene lapha,” kutsho uMnu Mpofu.
Abalimi laba khathesi balime imibhida kanye lamatamatisi esivandeni sabo lesi.
UMnu Mpofu uthe abalimi abahlala emapulazini aseduzane labo kabavaleli izifuyo zabo okwenza zicine zisidla izilimo zabo esivandeni.
“Esivandeni sethu silima izilimo ezehlukeneyo kodwa okwakhathesi silime imibhida kanye lamatamatisi kungakho izifuyo ezingavalelwayo ezivela emapulazini aseduze yizo ezidla izilimo zethu,” kutsho uMnu Mpofu.
Uthe injongo yesivande sabo lesi yikuthi baziphilise lezimuli zabo ngezandla zabo nanko phela belakho ukuzitholela ukudla kanye lokokuthengisa.
UNkosikazi Grace Tshuma laye olilunga leMasiyephambili uchaze kabanzi ngesifiso sabo sokuba bayethengisa izilimo zabo emkambo.
“Nxa siqala ukuhlanyela izilimo zethu siyabe sihlelile ukuba ilunga linye ngalinye kumele liphume lesivuno esinganani. Lokhu siyabe sikwenzela ukuba kusincedise ukuba nxa sisebenzisa imali siyisebenzisa njani, kodwa kuba nzima ukuthi sifeze izifiso zethu ngoba izilimo zethu ziyatshontshwa,” kutsho uNkkz Tshuma.
UMnu Mpofu uphethe ngokucela uncedo kunhlanganiso ezizimele zodwa kanye labantu abalesifiso sokubancedisa ngemali yokuthenga ucingo kumbe ngempahla yokuthi bakhe umduli ukuze kwehliswe inani lamasela angena ezotshontsha kanye lezifuyo ezidla izilimo ebusuku.
