uMthunywa
Yintatheli kaMthunywa
IPHAKATHI kwetshe lembokodo enye imuli yeKenmaur eLupane ngemva kokuba enye indoda eyafela emgodini walesisakhamuzi isivuke isipoko esesikhathazile ngokumemeza kunye lokugebha egodini leli phakathi kobusuku.
Insumansumane le kubikwa iqale enyangeni ezimbalwa ezedluleyo ngemva kwensuku ezimbili uMaxwell Tshuma ewele emgodini kaDumisa Sibanda kwahle kwaba yikuphela kwakhe, uMthunywa uyakuveza lokhu.
Intatheli ixhumane lesinye sezakhamizi zakule indawo uNkosazana Lungile Msipha ochaze ukuthi isipoko lesi saqala ukuhlupha umuyi engakangcwatshwa.
“UMaxwell uthe esefele emgodini wakoSibanda kwahlala nje insuku ezimbili kwathi ngemva kwalokhu engakangcwatshwa saqala isibane esingazwisisekiyo sihamba sisiyangena emzini wakoSibanda ilanga lisanda kutshona,” kutsho uNkszn Msipha.
Uqhubekele phambili njalo walandisa ukuba isipoko lesi siyake sizwakale sigebha emgodini ubusuku bonke sikhanyisile.
“Isipoko lesi sasizwakala sigebha umgodi lo ubusuku bonke njalo sikhanyisile. Kwakuthi nxa sigebha sibe simemeza amabizo abantu ababegebha lomuyi sithi basiqhubele insimbi zokugebha.
“Okunye njalo sasingena ekhaya siyisibane esikhulumayo sifike emkulwini simemeze sithi sifuna ukudla.
“Okwakungimangalisa yikuthi kuthiwa ekuseni kwakuthi nxa kutshiywe ukudla emkulwini lo kuvuke kudliwe konke,” kulandisa uNkszn Msipha.
UMnumzana Mbulisi Sibanda omunye wababegebha umgodi lo lomuyi uchaze ukuthi bona bacina bebaleka kulo umuzi ngenxa yalesisipoko.
“Thina saphetha sibaleka emzini kamnewethu ngenxa yesipoko lesi ngoba sasesisingenela endlini sisibize ngamabizo ebusuku.
“Umnewethu yena angikhulumi ngoba sasisithi singafika kuye sithi sifuna imali yaso esayisebenzelayo, laye waze wabaleka watshiya umuzi wodwa,” kutsho uMnu Sibanda.
Ebuzwa ngale indaba uMnumzana Dumisa Sibanda uvumile ukuthi indaba yenzakala emzini wakhe.
“Kuliqiniso sibili ukuthi isipoko lesi sangihlupha kakhulu kumnyaka ophelileyo ngaze ngabaleka emzini wami.
“Ngangithi nxa ngibikela abazali bakamuyi ukuba bazongilungisela bale bathi kangizibonele.
“Ngaze ngazidingela abantu bangilungisela ngikhuluma nje ngilenyanga ezintathu ngihlala emzini wami noma nje kusasekhona kancane okungikhathazayo kodwa sokunganeno.
“Okubuhlungu yikuthi umgodi wami ngahle ngawugqibela wona wawusuqalile ukuphuma amanzi. Ngemva kokufa kukamuyi abazali bakhe bangihlawulisa inkomo lemali bethi yimi engimbuleleyo,” kuphetha uMnu Sibanda.
