uMthunywa
YiNtatheli kaMthunywa
ABADLALI bekhilikithi kuleli babika ukuba abalankani ngokuzwa ukuthi uHeath Streak wathengisa imidlalo.
Bathe bazizwe beyangeka ngesehlakalo sokuvezwa kuka-Streak ukuthi wemukela imali yobungilimbane ngesikhathi engumqeqetshi womdlalo.
Inhlanganiso ye-International Cricket Council (ICC) ibike ngeviki edluleyo ukuthi uStreak kasavunyelwa ukuphatheka kunhlelo zalumdlalo okweminyaka eyisitshiya galombili.
UStreak uke waba ngumqeqetshi wamaChevron awadlalela waphinda waba ngukaputeni wawo njalo.
Ubengumzekeliso omuhle kwabasakhulayo kodwa uphenduke ihlazo.
“Usiyangisile uStreak,” kutsho omunye wabadlali bama-Chevrons ekhuluma lentatheli yephephandaba likazulu ngekhefu likaZibuse.
“Besikhangelele kuye ukuthi asicebise, asikhuthaze ngokuziphatha kodwa kwehlule.”
Kusenjalo umdlali wekhilikithi uSean Williams kubikwa uzaqhubeka engukaputeni weqembu lesizwe amaChevrons kumdlalo walo lePakistan.
IZimbabwe idibana lePakistan kumidlalo emithathu ye-T20 series edolobheni leHarare. UWilliams ukhethwe kulandela ukulimala kukaChamu Chibhabha.
Kumncintiswano lo, amaChevrons kuzamele ayibambe ngamandla nanko lomdlali othenjiweyo uSakandar Raza uhleli phansi ngenxa yokulimala isandla.
Kodwa amathemba akhona sekuphenduke ingcitshi yomdlalo uBrendan Taylor loCraig Ervine. Bobabili bebengekho kumidlalo edluleyo isizwe sidlala le-Afghanistan.
ULuke Jongwe owacina ukudlala kuT20 ngomnyaka ka2016 laye ubiziwe eqenjini.
Ugatsha lwezembiko ku-Zimbabwe Cricket luthumele umbiko wokuthi sekukhethwe abadlali abalitshumi lanhlanu abazalolongela ukudibana lePakistan.
Kubadlali laba kulabathathu abangakaze bedlalele isizwe ababalisa uTadiwanashe Marumani, uTanaka Chivhanga loTapiwa Mupfudza.
