uMthunywa
Ethel Ncube
AKUBIZWA ozwayo eYeoville eMzansi Afrika lapho izizalwane zakuleli lezeMzansi zizabe zihlangene ngoMgqibelo kuthakazelelwa ilanga lothando, iValentines Day.
Umcimbi lo wenzelwe abangathathanga lwehlukile ngoba wenzelwa abangendanga labangathathanga kuphela njalo kukhangelelwe ukuthi bajabule ngendlela emangalisayo. UPromise Sibanda owazakala ngokuthi nguDj Mapressa nguye ozabe engumqondisi womcimbi lo nguye oveze okunengi ngokuzenzakala ngomcimbi lo.
“Amalungiselelo omcimbi lo asesezingeni eliphezulu sokulindwe ilanga lakhona nje. Umcimbi lo kuzabe kubuya abangendanga labangathathanga abaleminyaka eyedlula 18 kuphela yibo abavunyelwayo. Abantu kumele babuye begqoke izigqoko ezilombala omhlophe lobomvu.
“Umhlabeleli uZamoe Xbiss odume ngengoma zothando uzabe ejabulisa abantu emcimbini lo. Inkampani okuthiwa yiBusiness Centre and TK cakes isilethe amakhekhe amabili azadliwa emcimbini lo, kuthi iHazel Nails ilungise abangathathwangwa inzipho abayi-17 ukuze babuye bebahle emcimbini lo,” kutsho uMapressa.
Uqhubekele phambili ebika ukuba kuzakholiswa emcimbini lo.
“Ababuyayo ubuya uthwele itshokoledi leluba lakho emcimbini, amaluba la azaphoselwa emcimbini akukhethi lapho azawela khona. Ukugidwa kuzabe kugidwa abantu bejabula kudliwa amakhekhe abantu bekholisa. Asiphakameni sonke siyelangazelela inyanga yothando abangathathanga labangathathwanga sidibane khonale ebunandini,” kuphetha uMapressa.
