uMthunywa
Ethel Ncube
UMCULO yindlela yokuzithozisa lokugcina imbali yabantu abatshiyeneyo. EMzansi Afrika bekubuthwene eHillbrow Theatre kugujwa impilo yeqhawe leZimbabwe uJoshua Mqabuko Njongolo Nkomo owaziwa ngokuthi uMdala Wethu kuviki ephelileyo.
Bekungasi muntu kulumkhosi bekulitshebetshebe likaTshangani.
Abahlabeleli beMatabeleland Entertainment News abasuka kuleli yibo abakhethe ukuthi bakhumbule imisebenzi lempilo yaleliqhawe ngomculo.
Umcimbi lo wenziwe ngoMgqibelo ngeviki ephelileyo lapho obekulezethekeli ezivela kungatsha ezitshiyeneyo.
Intatheli ixhumane lesinye isikhulumi, uMehluli Ndlovu oveze ukuthi loba bephandle kwelizwe abakhohlwanga amaqhawe asebenza nzima ukuze bathole uzibuse.
“Amanye amaqhawe aze alala engazidlanga izithukuthuku zawo elokhe ezama ukuthi ilizwe libesezandleni zabansundu. Loba singaphi siyabakhumbula abanikela igazi labo ukuthi sithole iZimbabwe yethu enhle,” kutsho uNdlovu.
Kumkhosi lo abantu bathokoziswe liqembu leZinjaziyaluma lona ebelihlabela ingoma zokubonga imisebenzi kaNkomo lendawo ezibizwa ngebizo lakhe ezibalisa igceke lendizamtshina, ikolitshi eseGwanda lesitalada sakoNtuthu kanye leminye imisebenzi ayenzela abakuleli.
Abahlabeli bancome kakhulu imisebenzi yamaqhawe ngokulwela langokuzinikela ekutholeni uzibuse.
Iphephandaba likazulu likhulumisane loMonica Ncube obeseMzansi Afrika emkhosini wokugubha impilo kamdala wethu.
“Okungijabulisayo yikuthi uzulu uze ngobunengi ezokhumbula elinye lamaqhawe esesisidla izithelo zabo ngenxa yomsebenzi wabo. Ngibonga uDkt Nkomo ngothando langesineke lokukhuthaza ukubambana ebantwini.
