uMthunywa
Thokozile Mbedzi
ABALIMI beShashe eBeitbridge sebesungule uhlelo lokulima izihlahla zamahalantshisi (oranges) lapho abalima bethelezela khona.
Uhlelo lolu luqhutshwa ngabe-Agritex.
U-Acting District Agritex Officer uNkosazana Alpha Mleya uveze ukuthi abalimi bakhuthazwa ukuthi baqoqane babe ngamaqembu balime izihlahla zamahalantshisi kuma-irrigation scheme abo.
UNkszn Mleya uthe kuhlelo lolu baqale ngokusungula i-irrigation eShashe njalo bahlose ukuthi baqhubekele phambili ngohlelo lolu kwezinye indawo ezibalisela eJovhe Dam lezinye ezilamanzi ukuze bathuthukise abalimi.
“Abalimi kumele bahlangane baphathisane kuhlelo lwe-irrigation ukuze bahlanyele izihlahla njengalokhu esesikusungule eShashi.
“EShashi abalimi sebelime izihlahla zamahalantshisi njalo sebeke bavuna. Uhlelo lolu luphakamise abalimi kakhulu kule indawo ngoba amahalantshisi abo athengiselwa izakhamizi eziseduzane, lezedolobheni leBeitbridge kanye leGwanda,” kulandisa uNkszn Mleya.
“Amanye siwasa e-farm gate lapho abalungisa khona umhluzi (juice).
“Siyajabula njalo ngoba abantu abafuna ukuthenga amahalantshisi banengi okwenza kube yibhizimusi enhle,” kutsho uNkszn Mleya.
Kubikwa abalimi laba okwakhathesi balime indawo engamahekitha angu-92,5 njalo isivuno sibe sihle kakhulu.
Wengezelele wathi bakhangelele ukuthi uhlelo lolu luzaphathisa abantu elizweni lanxa nje ludinga ukubekezela.
Abalimi bakwezinye indawo lapho okuzasungulwa uhlelo lolu sibakhuthaza ukuthi babekezele ngoba izihlahla zamahalantshisi kazizali masinya njengomumbu kodwa-ke nxa seziletha inzuzo umlimi uyabe sezuza inzuzo kokuphela.
Uphethe ngokucebisa abalimi ukuthi ukusebenzela ndawonye kuyinto enhle kakhulu njalo ethuthukisa ilizwe ngoba wonke umuntu uthola ulwazi ngesikhathi esifanayo ethapha amacebo ndawonye.
