uMthunywa
Thokozile Mbedzi
KULAMADODA amabili esiqintini seVengesa eZvishavane athelele enye indoda ayitshaya ayibulala ezondele ukuncitshwa utshwala.
Kuvele ukuba uBenny Mukuta oleminyaka engu-41 wesiqintini sePius ngaphansi kwenduna uMasunda wayenatha utshwala ebhawa yeChibonga mhlaka 20 Nhlolanja, uObert Nyoni loSimbarashe Nyevhe abangabesigabeni seVengesa basebethatha utshwala bukaMukuta, uthe ebabuza kanti wayesezithezele olulenkume ngoba bahle bamvukela ubhova bamthelela bamtshaya.
Ekhuluma lentatheli kaMthunywa isikhulumi samapholisa esabelweni seMidlands uInspector Emmanuel Mahoko uthe kulamadoda amabili abulele enye kubangwa utshwala.
“UMukuta wayenatha utshwala uNyoni loNyevhe basebethatha utshwala bakhe baqala ukuxabana bengasazwanani. UNyoni loNyevhe baqala ukutshaya uMukuta ngezibhakela ngapha bemkhahlela okwabangela ukuthi alimale umzimba wonke. Bebona ukuthi usethe daca phansi badliwa ngumswenya,” kutsho uInsp Mahoko.
Kubikwa uMukuta wenelisa ukuvuka waya emzini wakhe kodwa ngosuku olulandelayo wahanjiswa esibhedlela lapho abhubhela khona ngosuku olulandelayo.
Ababili laba lokhe bengakabotshwa njalo badingwa ngamapholisa.
“Sicela labo abangabe belolwazi lokuthi ababili laba abenza icala leli bangaphi babikele amapholisa aseduzane labo.
“Sixwayisa uzulu ukuthi ehlukane lomkhuba wokuxazulula ingxabano ngodlame,” kuphetha uInsp Mahoko.