uMthunywa
Msilisi Dube
INHLANGANISO ekhangele ngezempilakahle yabalimi eye Agricultural Medical Aid Society (AMAS) isiveze ukuba balutshwana abalimi abalama-medical aid okucina kubangela ukuthi inengi labo lingatholi isivuno esihle nxa kungenzakala ukuthi lihlatshwe yimikhuhlane.
Kubikwa abalimi abanengi kabakho kuma-medical aid schemes okubangela ukuba bengagula behluleke ukwelatshwa ngoba bengelamali zokuya esibhedlela.
UMnumzana Noel Moyo ongumqondisi wenhlangansiso le, uthe baphawule inhlanganiso le ngenhloso yokuthi abalimi bathole ukwelatshwa nxa bengagula.
“Sasungula uhlelo olubizwa ngokuthi yiFarm Medical Aid Scheme, okuluhlelo lokulondoloza impilakahle yabalimi. Sinanzelele ukuthi umlimi olempilakahle enhle nguye othola isivuno esihle,” kulandisa uMnu Moyo.
UMnu Moyo ubuye wachaza ukuba uhlelo lolu lulezigaba ezinengi kusiya ngesikhwama somlimi kungakho abalimi kumele balulandele.
“IMedical Aid Scheme le ilemikhakha etshiyeneyo ngakho umlimi ulakho ukukhetha ukuba ufuna yiphi ngoba siyazi ukuthi kulabalimi abalima indawo ezinkulu kungakho bayabe bemele bazikhethele umkhakha abawufunayo.
“Abalimi balakho ukungena ku-medical aid le besebenzisa inhlanganiso zabo kumbe bafike emahofisini eGrainmed Agricultural Medical Aid Society, wona atholakala endaweni ezitshiyeneyo kuzabelo zelizwe,” kugcizelela uMnu Moyo.
UMthunywa uxhumane lomunye umlimisi weNyamandlovu uNkosikazi Nompilo Ndebele wathi abalimi bemangweni wakhe kabalama-medical aid okwenza bangagula baphuze ukwelatshwa okuyikho okucina kusenza bengatholi isivuno esizwayo.
“Abalimi abanengi balindawo bavame ukuhlaselwa yimikhuhlane kakhulu. Nxa sebegula bayehluleka ukuya kwelatshwa ngoba bengelazimali.
“Kuqakathekile ukuthi abalimi laba bangene kuma-medical aid ukwenzela ukuthi bathole usizo nxa sebegula.
