uMthunywa
Blessing Moyo
ABABONA ngezokulima kuHulumende sebexwayise abalimi ngokuqakatheka kokuthi abalimi bahlale besazi ngomumo womkhathi ngoba kuyiyo kuphela indlela engabancedisa ekuhleleni inhlelo zabo eziphathelane lokulima loba ekufuyeni izifuyo zabo.
UMnunzana Dumisani Nyoni onguProvincial Agritex Officer esabelweni seMatabeleland North kunhlanganiso ye-Agritex ubikele abalimi ukuthi kubalulekile ukuba bahlale belolwazi ngomumo womkhathi ukuze benelise ukuhlela imisebenzi yabo yemasimini yalolosuku loba yaleyoviki.
“Ngesikhathi lesi esikuso esokulima kuqakathekile ukuthi umlimi ahlale esazi ngomumo womkhathi ngoba lokhu kuzamphathisa ekwenzeni inhlelo zakhe zokuhlanyela loba ukwekela ukuhlanyela kusiya ngokuthi umumo womkhathi walolosuku kuthiwa unjani.
Umumo womkhathi
“Kubalula kumlimi ukuhlela imisebenzi yakhe kusiya ngokuthi umumo walolosuku uyamvumela na ukuba enze leyomisebenzi kungela kuphambaniseka,” kuchasisa uMnu Nyoni.
“Ukubakwazi umumo womkhathi kuyasiza ukuthi umlimi angalahlekelwa kakhulu ngoba uyabe eselolwazi lokuthi engahlanyela khathesi izulu libuya nini lithole inhlanyelo yakhe isasesimeni esiqondileyo.
Abalimi bangezwa ngezomumo womkhathi kumawayilesi, kumabonakude loba babale kumaphephandaba.
Uqhubeke echaza njalo ukuthi nxa umlimi eselolwazi ngomumo womkhathi kuyamncendisa ngesikhathi esefaka ifethilayiza ezilinyweni zakhe ngoba uyabe eselolwazi lokuthi izulu libuya nini ukuze enelise ukufaka ifethilayiza yona engafuni ukufakwa endaweni ewomileyo kumbe ezahlala insuku yomile ngoba iyatshisa izilimo.
“Okunye njalo ukuba lolwazi ngomumo womkhathi kwenza umlimi aphathiseke ekwenzeni izinqumo ezifana lokuhlakula kanye lokwakha isibaya esilungileyo sezifuyo ngesikhathi sezulu kumbe umqando.
Umlimi uyenelisa ukuvikela izifuyo zakhe nxa esethe waba lolwazi ngomumo womkhathi,” kuphetha uMnu Nyoni.
