uMthunywa
Cornelius Luphahla
IZAKHAMIZI zezigabeni zeMbembesi eLupane zikhala ezimathonsi ngenxa yenhlanganiso yeForestry Commission esizalisa ukuthi zilime amasimu azo asezidakeni ithi aseduzane lomfula.
Inhlanganiso le kubikwa iqale lokhu lonyaka okuyikho okudanisa izakhamizi lezi ukuthi yayithuleleni iminyaka yonke le zilima kule indawo zingaxotshwa.
UMthunywa ukhulumisane lesinye isakhamuzi sakule indawo uMnumzana Henry Bigboy Moyo ochaze ukuthi ulokudana okukhulu ngesenzo esenziwa yinhlanganiso le sokubalisa ukulima bona bephila ngakho.
“Mina ngiyamangala ukuthi iForestry Commission kungani isikhathaza kangaka mihla yonke? Angazi ukuthi njengoba ingafuni ukuthi silime ithi sizaphila ngani?”
Uqhubekele phambili wachaza ukuthi yena seleminyaka edlula itshumi elima kule indawo kodwa uyamangala ukuthi kungani engaxotshwanga kudala.
“Isimanga yikuthi sengileminyaka engu-16 ngilima isigodi sami iForestry Commission ingakhulumi lutho kodwa khathesi khona iqala ukuthi singalimi lapha siguguda umhlaba.
“Kambe njengoba inhlanganiso le isithi singalimi ezigodini khona kuyikho okuvunde khona njalo okulamanzi amanengi pho ithi silime ngaphi njengoba izulu livele lingasani kuhle kulezinsuku, kutsho uMnu Moyo.
“Ngesifiso sethu ngabe bathi sime emangweni ongamamitha angu-30 usuka emfuleni manje bona bathi angu-50 okuyikuthi siyasala singaselamasimu,” kuchaza uMnu Moyo.
Ekhuluma lentatheli uNkosazana Nomusa Moyo uveze ukuthi kasakwazi ukuthi enzeni ukuze enelise ukuziphilisa njengoba inhlanganiso le isithi engalimi kule indawo.
“Mina ngibuhlungu ngoba inhlanyelo ebengilayo sengiyihlanyelile yaphela ngakho khathesi angazi ukuthi bathi ngizahlanyelani ensimini kabani njengoba insimu le kuyiyo ebengiyithembile lenhlanyelo yakhona,” kutsho uNkszn Moyo.
UMthunywa uxhumane loDistrict Conservator weForestry Commission uMnumzana Bulelani Ndlelambi wachaza ukuthi kuliqiniso ukuthi iForestry Commission iyalela izakhamizi lezi ukuba zilime ekhunjini lomfula.
“Izakhamizi lezi akufanelanga zilime ekhunjini lomfula ngoba ziguguda umhlabathi ngakho kufanele balime khatshana lomfula okungaba ngamamitha angu-50. Lokhu sesileminyaka emithathu sakukhuluma ngakho khathesi sizaquphuna umumbu abawulimileyo,” kuphetha uMnu Ndlelambi.
