uMthunywa
Nkosilathi Sibanda
ABANTU abahlala emadolobheni sebekhuthazwe ukuthi badle ukudla kwesiNtu ukuze benelise ukuzivikela emikhuhlaneni.
Isixwayiso lesi sivele kuzakhamizi zika-Wadi 22 esigabeni seNsiza esingaphansi kwenduna uJahana.
Izakhamizi lezi zitshaye inala engakaze ibonakale emasimini azo kulandela ukuna kwezulu elihle ngesikhathi sokulima kusukela ngoLwezi ngomnyaka odluleyo.
Ukwanda kokudla kwesiNtu kubonakale kumbukiso wokudla oqhutshwe eKombo Clinic lapho izakhamizi ebezibambene lenhlanganiso yeZimbabwe Project Trust.
IZimbabwe Project Trust iqoqe umbukiso lo kuhloswe ukukhuthaza umphakathi ngokuqakatheka kwenhlanyelo yezilimo zomdabu lokudla kwesiNtu.
Abalimi abedlula amatshumi amabili batshengise izilimo ezibalisela inyawuthi, amabele, uphoko, amathanga, amakhomane, idelele, umbhida lokunye abakuthole kusivuno salonyaka.
Umlimi munye ngamunye uphiwe ithuba lokuthi apheke ukudla lokhu ngendlela yesiNtu ukuze kufundiswane ukuthi endulo bekusenziwa njani.
Abalimi batshengise ubuciko babo begiga ukudla lokufundisa abasakhulayo indlela yokupheka okufaneleyo.
Ukudla okubukisiweyo okukhange inengi labantu abavele edolobheni lakoBulawayo kube ngamasi omcaba, umxhanxa, inhopi, inkobe, ucucuza, lemihlobo yemfutshwa eyehlukeneyo.
Kungxoxo lezakhamizi lezi, iphephandaba likazulu lithole ukuba inengi labo alisoze lilugxobe ezitolo liyothenga ukudla. Kubikwa iziphala zigcwele phamu.
UMlisa wakule indawo uNkosiyabo Dladla uthe lonyaka bakhomba ngophakathi.
“Inhlanyelo yesiNtu ilimeka lula lanxa izulu lililutshwana, umlimi ulakho ukudobha nxa ethe wahlanyela okwesiNtu okwaziwayo okufana lamabele.
“Khathesi nxa sinanzelela kulemikhuhlane eminengi efana letshukela, i-high blood pressure lokunye okudalwa yikuthi sesiqina ngokudla okungayisikho kwethu abantu abamnyama.Sisakhula, obabamkhulu abazange bebanjwe yimikhuhlane le, sasiyizwela emakhiweni. Thina abantu abaNsundu kumele sikuthakazelele ukudla kwenhlanyelo le esayitshiyelwa ngabadala,” kutsho uMlisa Dladla.
UDladla utshele uMthunywa ukuba izakhamizi zaphatheka kugatshompo, uhlelo olwalukhuthazwa ngabalimisi bakaHulumende. Uthe ukuthola isivuno esihle kwavela ekuthini bazimisela ukulima besebenzisa inhlelo ezihambelana lesimo somkhathi lokubunjwa komhlabathi waseNsiza.
Ukudla konke lokho sikuthole ngogatshompo.
Phakathi kwalabo abakade bebukisa bekuloMnumzana Prince Sivalo Mahlangu owe-Magriza Made Me Cook, uhlelo olubhoda izwekazi le-Africa lubukisa ukudla kwesiNtu.
Uhlelo lukaMahlangu lutholaka ku-YouTube.
Isazi ngezembali yesizwe lempilo yamaNdebele uMnumzana Pathisa Nyathi obengumhlonitshwa kulumbukiso uthe ukuqakatheka kokudla kwesiNtu akuphikiswa.
Ukhuthaze abantu ukuthi batshiyane lokuba ngothathekile belandela ukudla okuvela kwezinye isizwe.
