uMthunywa
Ethel Ncube
KULAMANINA ayisithupha eNdlelambi eFilabusi aselamaviki amathathu ethwele amagabha avuzayo ngenxa yokuhlutshwa ngumbobobo emizini yabo.
Kubikwa amanina la ahlukuluzwa emacansini ngowesilisa angamboniyo.
Intatheli ixhumane lesinye isakhamuzi uMnumzana Eliot Moyo oveze ukuthi indaba yombobobo iyaphila njalo lokhe isenzakala.
“Into le yenzakala njalo yathoniswa enduneni ukuthi kulomuntu ohluphayo ngokuhlukuluza abesifazana emacansini.
“Umuntu wakhona uyaziwa njalo uhlala ethwele ilembu elimhlophe eligoqiweyo kodwa akwazakali ukuthi kuyabe kulani,” kuchaza uMnu Moyo.
“Indaba le ithoniswa enduneni ngangikhona, omunye umama waveza ukuba wathi evuka ekuseni wabona umakhelwane wakhe edlalisa isitho sakhe sangasese emkhangele uthe ethi mehlo suka wezwa isitho somuntu ongubaba sesikuye lumama. Wazizwa eselele lomuntu wesilisa emile kodwa engamboni. Umama lo wachaza ukuthi loninazala laye ukhala ngento yinye yokuvuka emanzi angani ubesemacansini,” kutsho uMnu Moyo.
Uqhubekele phambili echaza ukuthi omunye umama indoda simhlupha ngendaba yombobobo.
“Umama lo uzithwele kamzweli uyamboboba kuphela indoda isisala umthwalo wayo isithi ngowalowo ahlangana laye emacansini engamboni okuyinto ebuhlungu kakhulu.
“Enduneni yathoniswa kodwa ayizange iphele laloba umakwenza wavuma waxolisa kodwa lokhe eqhubekela phambili,” kutsho uMnu Moyo.
Iphephandaba likazulu lizwe ukuthi lasebusuku omama kabaphumuli ngoba uyabahlukuluza kuphela.
Ekhuluma loMthunywa omunye wabomama owahlukuluzwa yindoda yombobobo le oziveze ngokuthi nguMaTshuma uchaze ukuthi abasakwazi ukuthi benzeni ngalubaba.
“Sesisima ngokuhlala sigeza kuphela ngoba kasiphumuzi ungavele umbone ebhoda ngemva kwendlu ubaba lo emzini wakhe uhle wazi ukuthi seqalisa ukusebenzisa umuthi wakhe.
“Mina ngathi ngimkhuza ukuthi abosihlonipha angadlalisi isitho sakhe phambi kwethu wangitshela wathi uyabe ezenwaya kuyini okumangalisayo.
“Sadlulisela indaba le enduneni uNdube lapho lundoda afika wavuma wathi uhlala esenza lami, ngezwa amadolo eqanda ukuthi uyadelela,” kutsho uNkszn Tshuma.
Iphephandaba likazulu lixhumane lenduna uNdube oveze ukuthi udaba olunjalo lwafika kuye.
“Babuya omama bebanengi bezokhalaza ngabakuzwa emizimbeni yabo. Iqiniso lakhona angilazi ukuthi limi njani ngoba into leyo ifana lobuthakathi pho-ke ukuhlola ubuthakathi angikwazi,” kuphetha induna uNdube.
Imizamo yokuxhumana lalowo ocatshangelwa ukuthi ulombobobo yehlule ngoba ucingo lwakhe belungangeni.
