uMthunywa
YiNtatheli kaMthunywa
BATHABE bamanzi te abantu beManjolo, eBinga ngemva kokuba abalimi abangu-60 betholiswe inkukhu zamaqanda ukuze babelakho ukuzithuthukisa.
Abalimi laba baphiwe inkukhu lezi ngomunye umlungu ovezwe ngokuthi nguAdam Moffat yena ongumngcinisihlalo wenhlanganiso yeHelping Hand, ngenhloso yokuba abantu bathole ukuziphilisa hatshi ukuhlala phezu kwezandla.
Ekhuluma lephephandaba likazulu usobhuku walesisigaba uMnumzana Adam Ndlovu njalo ongomunye wabalimi abaphiwa lezonkukhu, uthe umlungu lo usebenzelana lezinye inhlanganiso ezizimele zodwa ezifana leCaritus zona ezilenhloso yokuthuthukisa abalimi bezigabeni ezitshiyeneyo.
Uthe abalimi babephiwa inkukhu ngesivumelwano sokuthi nxa sezikhulile umlimi uzaphiwa imbadalo yokuzigcina kusiya ngokuthi uzigcine kuhle kumbe hatshi.
“Umlimi ubethatha inkukhu azenelisa ukuzigcina, mina ngathatha eziyi-2 500 kodwa ngokusilela kwamanzi esigabeni sethu inengi labalimi lacina lithatha ezinlutshwane,” kulandisa uMnu Ndlovu.
Kubikwa abalimi laba babuye baphiwa ucingo kunye lamapulastiki okwakha izilungu lezi. UMnu Ndlovu uqhubekele phambili ekhuthaza inhlanganiso ezizimele zodwa ukuthi ngaphandle kokuthi zibaphathise ngezifuyo langempahla yokulimisa kazibancedise njalo ngokubagebhela izibholane ngoba uhlupho lwamanzi esigabeni sabo lusenza bengaphatheki enhlelweni zokulima ngokugcweleyo.
“Isigaba sethu okwakhathesi sibhekane lohlupho lwamanzi osekubangela ukuthi abantu abanengi besabele khatshana nxa kukhulunywa ngendaba zokufuya loba ezokulima,” kuphetha uMnu Ndlovu.
