uMthunywa
KULEQEMBU lenguqu elihlohle amabhola angu-59 kumdlalo owodwa, qede lapho laxotshwa enkundleni.
Kubikwa iMatiyasi FC eyesabelweni seLimpopo eSouth Africa isikhitshwe kumdlalo wenguqu yinhlanganiso yeSouth African Football Association (Safa), kulandela ukunqoba kwayo iqembu leNsami Mighty Birds nge 59-1 kumalanga ambalwa adluleyo.
Amabhola angu-41 ahlohlwe ngabadlali beNsami Mighty Birds. Amaqembu womabili adlala ku-ABC Motsepe League.
Kubikwa lomdlali ophiwe ikhasi elibomvu oweNsami Mighty Birds laye uphume ezihlohlele ibhola egedini leqembu lakhe esigabeni sesibili.
Ngokuzwa lokhu, inhlanganiso ye-Safa iphange yahluza umdlalo lo, okuyilapho okuvele ukuthi kukhona okutshaya amanzi.
Iwofisi yalinhlanganiso eLimpopo yenze umhlangano lamaqembu womabili mhlaka 25 Nkwenkwezi eGiyani. Amaqembu la etheswe icala lobugwelegwele lokwephula imthetho yenguqu.
Inhlanganiso ye-Safa ivumelane ukuxotsha amaqembu la ebholeni okweminyaka emihlanu, yaphinda yagcona inkokheli zawo, yabeka ukuba abasavunyelwa ukusondelela umdlalo wenguqu.
Kusenjalo, kuligi efanayo iqembu leShivulani Dangerous Tigers lanqoba iKototo Happy Boys nge 33-1. Abadlali be Kototo Boys bazihlohla amabhola ayisikhombisa.
Amaqembu la ajeziswe ngokuxotshwa emdlalweni. – Ubulembu.
