uMthunywa
Nkosilathi Sibanda
UBUCIKO bokucomba okwenziwa ngamaNdebele kuzabukiswa emphakathini kulimpelaviki kumbuthano obizwa ngokuthi yiMatobo Pot Project.
Umbukiso lo uqoqwe yiGerman Embassy ibambene lenhlanganiso ye-Ekhaya Gaia eyakoBulawayo.
Bazakuthi gwaqa enkundleni ye-Orange Elephant koBulawayo omama abayizakhamizi esigabeni seMatobo, okuyibo abanikazi bombukiso lo olendikimba ethi “From Huts to Pots”.
Ngenhloso yokugcina isiko lokudweba lokucomba okukhona kulumhlubulo welizwe, iGerman Embassy le-Ekhaya Gaia, zasungula umbukiso lo ngoMpalakazi ka2022.
Inhlanganiso ye-Ekhaya Gaia yiyo eyaqala lumsebenzi, ivula umbukiso we-My Beautiful Home Project, osudume kakhulu kuziqinti zeMatobo.
Umbiko ovela kunhlanganiso lezi uveze ukuba kuzabukiswa imisebenzi emihle enziwe ngomama beMatobo.
“Umbukiso lo uvulwa mhlaka 20 Nkwenkwezi. Iphurojekithi le ibalisa ukufundiswa kwabomama abaphuma kuma wadi eMatobo, abasebenzisa ama-brush lependa yohlobo lwe-acrylic, ekucombeni imbiza,” kutsho umbiko lo.
“Abacombi laba bayabelana ulwazi ngabakwenzayo. Omunye lomunye ubukisa ithalenta lakhe lokucomba okutshengisa ubungcitshi lobunono besikolo esilondolozwe okweminyaka eminengi.
Inhloso yikuphakamisa isiko lokuthuthukisa omama beMatobo kunye lokukhankasa ngemisebenzi yabo ukuze yaziwe kwezinye indawo zakuleli laphetsheya.”
Bathe phezulu kwalokho, imisebenzi yokucomba imbiza le ikhangelelwe ukuthi iguqule impilo yabomama laba.
“Sifuna imisebenzi le ibonakale, ngesikhathi sinye benelise ukuba lamabhizimusi, batshintshe impilo zabo.”
Kubikwa mhla welanga uzulu uzathokoziswa ngabaculi ababalisi uStango loNongoma, Drums of Peace, Asante-Mo loThandoe.
