uMthunywa
Cornelius Luphahla
BEHLULEKILE ukwehlula ondofa otsikamutanda eJibajiba eLupane nanko phela bahlalwe amadundulu ngundofa wababhuqa okubatshiye bethoba amanxeba baze baxolisa ngeviki ephelileyo.
Kubikwa otsikamutanda laba bebezama ukukhipha undofa emzini kaNkosazana Rosina Moyo.
Imbedumehlwana le yenzakale emulini yakoNdlovu.
Kubikwa undofa lo utshaye abaphurofethi kanye labantu akade bezama ukumkhipha omkhulu wabo uThomas Sithole waze watshaya utshani.
Kubikwa mhla abaphurofethi bezokhipha undofa lo bacela imuli yakoNdlovu yonke ukuthi izobancedisa ngokuhlabela ubusuku bonke.
Ngalesosikhathi undofa lo wahle waqala ukutshaya abantu ngamagade okwenza abaphurofethi baze bacela ezinyaweni.
UMthunywa uphuthume wayafika kule indawo wakhulumisana loNkosikazi Cynthia Ndlovu waveza ukuthi wayekhona mhla betshaywa ngundofa njalo wayengazi ukuthi babizelweni.
“Ngangikhona mhla abantu betshaywa ngundofa lo njalo ngangingakwazi ukuthi sibizelweni. Sabizwa ilanga lingakatshoni sahlala kwathi sokungabo 6 ntambama uSithole wathi usibizele ukuthi sizoncedisa ekukhipheni undofa osehluphile koMaMoyo.
“Sathi sesifuna ukubaleka wathi ozaphuma ekhaya undofa lo uzamtshaya,” kutsho uNkkz Ndlovu.
UNkkz Ndlovu uqhubekele phambili walandisa ukuthi bathi besahlabela undofa lo waqala ukubabiza ngamabizo ethi kababuyele emizini yabo.
“Sathi sisahlabela sezwa kulomuntu okhuluma angathi ulamalimi phandle esibiza ngamabizo ethi kasibuyele emizini yethu ngoba uzasitshaya. Sathula zwi undofa lo waqala ukufuqa umduli wendlu esasihlabela sikiyo waze wadilika nganxanye.
“Ngalesosikhathi abantu abangamadoda bahle baqala ukubuza ukuthi ngubani okhulumayo bathi kahambe lapho avela khona. Undofa lo wababiza ngamabizo ababebakhulu wabatshaya kakhulu ngamagade. Abaphuma betshayiwe baba bahlanu njalo kwaba nguDavid Ndlovu, Mvangeli Sibanda, Tinashe Moyo, Julias Ndlovu loSipho Ndlovu,” kutsho uNkkz Ndlovu.
UMnumzana Sipho Ndlovu omunye wezakhamizi ezazikulumuzi ngalelilanga uveze ukuthi ngalesisikhathi undofa lo ebatshaya babebona umuntu omncane olenwele zekhiwa.
“Kwathi ngesikhathi undofa lo eseqalile ukusijikijela ngamagade sabona umuntu omfitshane kakhulu elenwele zekhiwa ephandle. Umuntu lo wayengakhanyi ukuthi ngubani. Mina wangibiza ngebizo wathi kangibuyele emzini wami, ngithanda izinto, uzangitshaya.
“Ngathi ngimbuza ukuthi ngithanda izinto ngenzeni wangitshaya ilihlo ngegadi ngalimala ngahle ngathula kwaba yikho ukusila kwami,” kutsho uMnu Ndlovu.
UNkosazana Edna Ndlovu oyisihlobo sakulo umuzi okwakukhitshwa khona undofa ebuzwa ngale indaba uchaze ukuthi undofa lo wathi lapha wafika kudala njalo kukhanya wayelobudlelwano labotsikamutanda laba.
“Undofa lo bathi bembuza ukuthi ngowangaphi wathi abanikazi bakhe bathi engakhulumi ukuthi ngowangaphi wabuya wathi lapha wafika ngo1991 ngakho kasuki. Into eyenza ngacabangela ukuthi undofa lo ngowabotsikamutanda laba yikuthi bahle baphuma phandle babaleka sababiza baze babuya undofa lo esefuna ukudiliza indlu.
“Ekufikeni kwabo bathi umzukulu walapha ekhaya uMvangeli Sibanda aphume phandle ayebamba undofa lo ukuze ahambe. Baphuma laye-ke wafika wambamba kwaba yikho ukuhamba kwakhe. USithole wathi undofa lo kakhipheki ufuna kukhitshwe inkomo ezintathu ukuze amkhiphe,” kulandisa uNkszn Ndlovu.
UNkszn Rosina Moyo umnikazi womuzi lo okwakukhitshwa khona undofa lo uveze ukuthi undofa lo yena kamazi njalo ubuhlungu ngoba otsikamutanda laba bamthathela inkomo zakhe bengamncedanga ngalutho.
“Mina ukuthi kulondofa lapha ekhaya kangikwazi otsikamutanda laba yibo abathi kulondofa ngoba ngagula ngaya kibo bafika bathi bafuna i-$200 ukuze bakhiphe undofa ongigulisayo. Okubuhlungu yikuthi undofa lo abamkhiphanga kodwa bathatha inkomo zami ezimbili inkabi lejongosi bethi ngingekela ukubanika bazatshela undofa lo angibulale kanye lemuli yami,” kutsho uNkszn Moyo.
Usobhuku wakulesisigaba uMnumzana Mncedisi Moyo ebuzwa ngale indaba uvumile ukuthi uyayazi wathi kodwa wayengekho lapha okwakukhitshwa khona undofa lo.
“Indaba yokuthi kulezakhamizi ezatshaywa ngundofa belabo-tsikamutanda ngayizwa sibili njalo ngezwa ukuthi undofa lo kabamkhiphanga. Abanye balezizakhamizi abakho ngaphansi kwami bakomunye usobhuku,” kutsho uMnu Moyo.
Imizamo yokukhulumisana lotsikamutanda uMnumzana Thomas Sithole yehlule ngoba ucingo lwakhe aludojwanga muntu.
Isikhulumi samapholisa esabelweni seMatabeleland North uSayijeni Namatirai Mashona ebuzwa ngale indaba uchaze ukuthi kabakayizwa ngakho bazayihlolisisa.
“Indaba yabotsikamutanda abathethe inkomo zesinye isakhamuzi eJibajiba ngemva kwemvumo yaso asikayizwa ngakho sisazoyihlolisisa ukuze ilungisiswe,” kuphetha uSayijeni Mashona.
