uMthunywa
Johas Moyo
INHLANGANISO yeVeterinary Services esabelweni seMatabeleland South isicebise abafuya inkomo ukuthi bangathuthi inkomo zingahlolwanga njalo bangavumeli inkomo ezivela kwezinye indawo ezingahlolwanga ukuze benqabele imikhuhlane.
UDokotela wezifuyo uEnat Mdlongwa weVeterinary Services ukhuthaza abalimi ukuthi baqaphele imikhuhlane ekhona okumele bayivikele egoqela i-foot and mouth, lumpy skin kanye leminye ethelelwanayo nxa kuthuthwa izifuyo zisuka kwenye indawo zisiya kwenye.
“Khathesi yisikhathi lapho abalimi abanengi abathutha khona izifuyo kodwa ngithanda ukukhuthaza abafuyi bazo ukuthi babone ukuba ziyahlolwa zingakasuki kwenye indawo zisiya kwenye.
“Lokhu kuzaphathisa njalo ukuthi zivikelwe emikhuhlaneni ethelelwanayo elakho ukuzihlasela,” kutsho uDkt Mdlongwa.
Uqhubekele phambili ekhuthaza kanye lokufundisa abalimi ngemikhuhlane ekhona ikakhulu eGwanda ekhuthaza abalimi ukuthi kulabo abafuna ukuhambisa inkomo zabo emlageni ababone ukuthi zivikelekile kuqala.
“Abafuyi benkomo kababone ukuthi bayahlabisa izifuyo zabo njalo bangavumeli umhlambi wenkomo odlulayo esigabeni sabo abangawaziyo ngoba lokho kuyingozi.
“Inkomo lezo zilakho ukutshiya zithelele ezalapho imikhuhlane,” kutsho uDkt Mdlongwa.
UDkt Mdlongwa uphinde wacebisa abalimi ngengozi engaba khona nxa izifuyo zithe zahlaselwa yimikhuhlane etshiyeneyo ngalesi isikhathi njalo uveze ukuthi uHulumende usechithe imali engange 5,1 million yamadola ezama ukwelapha imikhuhlane yonaleyi ethelelwanayo emangweni.
“Kungumlandu kamlimi ukuthi abone ukuthi izifuyo zivikeleki ukuze uHulumende engacithi eyinye njalo imali eselapha imikhuhlane leyi. Izifuyo kazihlale zivikelekile ngaso sonke isikhathi’ kutsho uDkt Mdlongwa.
Uphethe ngokucebisa abalimi ukuthi bagcine kuhle izifuyo zabo ngoba ngesikhathi sendlala inkomo ezinengi ziyafa ngemikhuhlane esukuma phansi yikho kuqakathekile ukuthi zihlale zihlolwa njalo zivikelekile.
