uMthunywa
Blessing Moyo
ABALIMI sebekhuthazwe ukuthi baqalise amalungiselelo okulima amatamatisi esikhathi somqando ngoba elakho ukunika umlimi inzuzo enhle ngoba abalimi abanengi besesabela khatshana ukuwalima ngesikhathi lesi.
UNkosazana Treggie Mpofu oyingcitshi kwezokulima kunhlanganiso ye-Agritex ubike ukuba loba umqando uhlasela amatamatisi akutsho ukuthi abalimi bangawalimi ngesikhathi somqando kuze kufike isikhathi sokutshisa.
“Amatamatisi alakho ukuphanjaniswa ngumqando kodwa lokhu akutsho ukuba akusamelanga alinywe. Labo abalakho ukwenza ama-green house balakho ukuwalima khona ukuze isilimo sabo singatshazwa ngumqando.
“Ukulima amatamatisi ngesikhathi somqando kuhle ngoba abalomkambo omkhulu ngoba balutshwana abayabe belawo.
“Ngesikhathi somqando abantu badla kokuphela ukuze bakhudumale ngakho umlimi ohlakaniphileyo uyathatha lelithuba ukuthi alime amatamatisi ngesikhathi somqando ngoba aba lomkambo omkhulu,” kuchaza unkszn Mpofu.
“Abalimi abanengi bayesaba ukulima amatamatisi ngesikhathi somqando ngoba ayatshazwa bacine belahlekelwa yinzuzo kodwa umlimi engawaphatha kuhle ayenza kuhle. Okuhle ngokulima amatamatisi kuqanda yikuthi kukalutshwana ukuthi abanjwe yimikhuhlane. Imikhuhlane ehlasela amatamatisi ivame ngesikhathi sokutshisa lesezulu,” nguNkszn Mpofu lowo.
Ubike njalo ukuthi okudingakalayo nje yikuthi avikele amatamatisi akhe emqandweni.
“Umlimi kumele avikele amatamatisi akhe ekutshazweni ngokubasa umlimo kube lentuthu ezadlula phezu kwezilimo zakhe.
Indlela le ivikela ukuba umtshazo ungahlali esilimeni samatamatisi,” kutsho uNkszn Mpofu.