uMthunywa
Pumulani Mpofu
Akula muntu othi nxa ezalwa azicelele kuNkulunkulu ukuthi abeyintandane. Wonke umuntu ufuna ukuthi nxa ekhula ebelabazali bobabili, athole imfundiso kibo. Kuba lula ukuthi ukhulele ngakini usazi ukuthi uyathandwa njalo abazali bakho bengayenza noma yini betshengisa ukuthi bayakuthanda. Nxa kuyikuthi kufuneka imali yesikolo abazali bakho bayenelisa ukubona icebo, kumbe ukuthi badinge imisebenzi baqhatshwe babhadalwe njalo bayiqogelele ize yenele imali yesikolo kumbe eyempahla zesikolo. Kukalutshwane ukuthi umuntu ongasimzali wakho uthole ekwenzela into enje.
Kudinga ukuthi umutu azimisele nxa esethe wavuma ukugcina izintandane. Akumelanga uthi nxa uzithatha uhle uzibonele izigqili zakho ozabe ukhomba nje ngomunwe zikwenzela. Yikuthi nje inengi lethu siyakhohlwa ukuthi okwenza uBanda loPhiri kuyamenza. Ngoba phela uyabe ungakwazi ukuthi wena uyafa nini, engxenye zonalezi intandane ozihlukumezayo yizo ezizakugcinela abazukulu bakho. Kambe nxa ubuziphethe luklubhu ubona ingani abazukulu bakho bangabaphatha kuhle na?
Angikholwa sibili ngoba bayabe belenzondo abanye abangeke bavume khona ukubagcina besesaba ukuthi bangafisa ukuphindisela kibo. Kukanti labo abantwana bayabe bengakwazi lutho sebefela amafufu njengamagundwane. Kukanti lawe usungathwala nzima sezisala ukukugcina usukhulile, ngoba sonke siyazi ukuthi amandla nxa esephela awavalelisi, avuka engekho. Uyathi usithi qaqabu ubone ususehluleka khona ukuhlakula, kambe nxa wawuziphethe kuhle intandane ngeke zikuqhatshele abantu ukuthi balime wena uhlezi, kumbe zibe zibona ukuthi inyanga zonke awusweli ukudla kumbe izembatho. Kodwa nxa wawuziphethe kubi hanti ziyakulahlela iganga.
Kule iviki ngithole ithuba lokuxoxisana loSindisiwe Siziba owabhujelwa ngumnawakhe uCecilia. UCecilia wayelabantwana ababili uPrecious loNokuthula. Bobabili abantwana laba bazalelwa eMpilo koBulawayo, njalo balama-health card. Abantwana laba bakhulela kuSindisiwe. UCecilia wayethi nxa esekhulelwe abuye azobelethela eZimbabwe atshiyele umntwana udadewabo abuyele eSouth Africa.
Wasuka wagula uCecelia wacina edlula emhlabeni watshiya abantwabakhe bengela ncwadi zokuzalwa. Owathatha iburial order kaCecelia ngumnewabo uThabo. Njengoba uThabo kunguye owahamba wayabhalisa iburial order akasafuni ukuthi athathele abantwana bakamuyi incwadi zokuzalwa.
USindisiwe uveza ukuthi ngemva kokubhubha kukaCecelia yena wayadinga umsebenzi ukuthi azame ukunakekela imuli yakhe lentandane zikadadewabo, kodwa abantwana wayezabadingela unkazana owayezabe ebakhangele yena engekho. UThabo wakwala lokhu wathi yena uzathatha uNokuthula omncane, amfundise njalo abone ukuthi izinswelo zakhe zonke uyazifinyelela. Kwathi ke udadewabo oyakhele eSilobela wathi yena uzathatha uPrecious osengani usekhulile.
USindisiwe uthi njengoba abafowabo basebemethule ijogwe lokudinga inkazana yena wazama ukuthi athumezele uNokuthula loPrecious imali zesikolo.
USindisiwe uthe umangele ngomnyaka ophelileyo uPrecious esemtshela ukuthi umama omdala wakhe uthe kasela mali kungangcono ahlale phansi njalo lendaba yokuthi abe elokhe etshitsha esiya esikolo esiyaxolisa ukuthi basazama ukuthi batholele uPrecious incwadi yokuzalwa imupha umthwalo.
UPrecious uthe esephume esikolo wayesengunkazana wekhaya, senguye oyenza yonke imisebenzi ngekhaya. Wathi ebona lokhu sekumsinda wacela kumngani wakhe imali yokuthi agade ayekumalumakhe ePlumtree kodwa walahleka waze wacina esehlala losobhuku walapha ayelahlekele khona.
USindisiwe uthe ngelinye ilanga efona efuna ukukhuluma loPrecious udadewabo wamtshela ukuthi uPrecious uselenyanga ezimbili engaziwa ukuthi wayangaphi kodwa wasuka esithi uyakomalumakhe uThabo kodwa kakafiki. Kukanti uPrecious njengoba wayelenombolo zikanina omdala zikamakhalekhukhwini wazipha usobhuku onguye owamfonelayo.
Usobhuku lowo wamtshela ukuthi uPrecious ukuye njalo wayelakho ukuthi amgadise ibhasi yena abe semhlangabeza eRenkini koBulawayo nxa engabuya evela eSouth Africa.
Lakanye wacina ebuyile uPrecious, njalo nxa uSindisiwe ethi uzama ukulungisela uPrecious incwadi yokuzalwa, uThabo yena lokhe edonsela emuva ngoba uyala ukuthatha incwadi yokufa kaCecelia.
Njengenhlanganiso samxwayisa uSindisiwe ukuthi ayedinga iburial order thina njengenhlanganiso sizafonela uThabo ukuthi abuye azoqedisa lokhu akuqalayo ukwenzwela ukuthi uNokuthula loPrecious benelise ukuba lencwadi zokuzalwa ukwenzela ukuthi labo bafunde njengabaye abantwana.
Asihlanganeni ngeviki elizayo
Umlobi uthinteka kukheli ethi [email protected]
Laku nombolo ezithi 0773 195 055/ 09 881508
